Plotësohet aktakuza kundër kanadezit që dyshohet se dërgoi “pako për vetëvrasje”

Prokurorët e Kanadasë kanë plotësuar akuzat për vrasje kundër, Kenneth Law, burrit që dyshohet se dërgoi me postë “pako për vetëvrasje” dhe i cili dyshohet se është i lidhur me vrasjen e më shumë se 100 personave në disa vende, shkruan The Guardian.

Lawi, i cili ka dalë në gjyq të enjten, tani përballet me 14 akuza për vrasje të shkallës së parë në Ontario dhe 14 akuza për këshillim dhe ndihmë për vetëvrasje. Kodi penal i Kanadasë dënon këdo që “këshillon ose nxit” një person drejt vetëvrasjes me dënim deri në 14 vjet burg. Viktimat janë të moshave nga 16 deri në 36 vjeç.

Hetuesit kanë thënë se Lawi, i cili u arrestua në maj të vitit të kaluar, drejtonte disa faqe interneti që përdoreshin për të shitur substanca toksike që mund të përdoreshin për vetëdëmtim, duke i dërguar ato në më shumë se 40 vende.

Të martën, prokurorët në Ontario plotësuan akuzat kundër Lawit.

Më parë, Lawi, ish-inxhinier i hapësirës ajrore që punonte në një kuzhinë hoteli, po përballej me disa akuza për vrasje të shkallës së dytë për rolin e tij në shitjen e substancave toksike përmes disa kompanive. Vendimi i prokurorëve për të plotësuar akuzat sugjeron se ata kanë prova të mjaftueshme për të vërtetuar se Lawi qëllimisht shtyu klientët e tij drejt vdekjes.

Avokati i Lawit, Matthew Gourlay, thotë se klienti i tij do të deklarohet i pafajshëm për akuzat.