Drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, ka komentuar opinionet se shkalla e lartë e vdekjes nga COVID-19 nuk është shqetësim i madh nëse ata që humbin jetën janë kryesisht të moshuar.
“Të pranojmë vdekjen e dikujt për shkak të moshës është dështim moral në pikën më të lartë të mundshme, dhe nuk duhet t’ia lejojmë shoqërisë sonë të sillet në këtë mënyrë”, ka thënë ai.
Shefi i OBSH-së ka kërkuar nga qeveritë e shteteve të dëgjojnë shqetësimet e qytetarëve kundër masave për COVID-19, duke shtuar po ashtu se edhe protestuesit duhet të kuptojnë se virusi është i rrezikshëm.
Ai ka thënë se është e rëndësishme “të dëgjohet çfarë po kërkojnë njerëzit, çfarë po thonë njerëzit... dhe duhet të merremi me dialog të sinqertë”.
“Virusi është i vërtetë. Është i rrezikshëm. Lëviz shpejt dhe vret. Duhet të bëjmë çmos që të mbrojmë vetveten dhe të tjerët”, ka shtuar ai, raporton “The Guardian”.
