Një roje sigurie, i cili ishte duke punuar në “Michigan Family Dollar” është vrarë në fundjavë pas një fjalosje me një konsumatore, të cilës i kishte thënë se duhet të vendosë maskë para se të futet brenda për të blerë gjëra ushqimore, njofton BuzzFeedNews.
Sipas raportit të policisë, incidenti filloi kur roja e sigurisë, Calvin Munerlyn, i tha vajzës së Sharmel Teaguet, emri i të cilës nuk është bërë i ditur, se duhet të vendosë maskë për t’u futur në dyqanin në Michigan. Përderisa vajza është kthyer te vetura e familjes, nëna e saj, Teague, e cila ka qenë me maskë, ka filluar t’i bërtasë rojës. Prokurori ka thënë që pastaj Munerlyn, i ka thënë një arkëtari që të mos e shërbejë nënën e vajzës.
Policia ka thënë se kamerat e sigurisë në dyqan, tregojnë se pas fjalosjes, nëna është futur në veturë dhe është larguar nga vendi për t’u kthyer 20 minuta më vonë. Këtë herë, sipas raportit të policisë, babai i vajzës, vëllai i saj dhe ajo, kanë dal nga vetura. Babai i vajzës, Larry Teague, iu ka afruar rojës së sigurisë, Calvinit dhe ka filluar t’i bërtasë me arsyetimin se ai nuk i ka respektuar femrat e familjes e tij.
Oficerët e policisë e kanë gjetur Calvin Munerlyn të mbuluar në gjak në derën e dyqanit.
Policia e ka arrestuar nënën e vajzës, Sharmel Teague, mirëpo burri dhe djali i saj janë ende në arrati. Të tre janë akuzuar për vrasje me paramendim të shkallës të parë.
“Sipas të gjitha shenjave, roja z. Munerlyn ka qenë i vetëm duke e bërë punën, duke e zbatuar njëkohësisht urdhrin e guvernatorit sa i përket rregullave të masave në lidhje me pandeminë Covid-19, për sigurinë e punëtorëve dhe konsumatorëve’’, ka thënë prokurori David Leyton.
‘’Kjo thjeshtë nuk mund të jetë e vërtetë, fëmijët e mi kanë nevojë për babanë e tyre”, ka thënë gruaja e Munerlynit, Sims Munerlyn, për televizionin ËEYI.
Munerlyn ka lënë tetë fëmijë.
