Ministri i Jashtëm iranian takon liderin politik të Hamasit

Ministri i Punëve të Jashtme i Iranit, Hossein Amir-Abdollahian, ka takuar liderin politik të Hamasit, Ismail Haniyeh, në Doha të Katarit të shtunën, sipas agjencisë së lajmeve të Iranit, IRNA.

Është takimi i parë zyrtar i zyrtarëve iranianë me Haniyehun, që nga sulmi i grupit militant palestinez mbi Izraelin të shtunën e kaluar dhe nisjen e luftimeve.

S’ka detaje se çfarë është diskutuar mes palëve. Në disa raste Irani është akuzuar si shteti që qëndron prapa Hamasit.

Të shtunën, lufta është përshkallëzuar me kërcënimin e Izraelit për ndërhyrje tokësore, ajrore e detare në Gaza. Tashmë ka përfunduar edhe urdhri izraelit për evakuim nga Gaza të mbi 1 milion palestinezëve.