Kremlini të hënën ka hedhur poshtë akuzat nga pesë vende evropiane se shteti rus ka vrarë kritikun e ndjerë të Kremlinit, Alexei Navalny, dy vjet më parë, duke përdorur një toksinë nga bretkosat helmuese.
Sipas Kremlinit, pretendimet “nuk bazohen në asgjë”.
Navalny, kritiku më i shquar i brendshëm i presidentit Vladimir Putin, ka vdekur në shkurt të vitit 2024 në moshën 47-vjeçare në një burg të largët në Arktik.
Vdekja e tij ka ndodhur një muaj para se Putini të arrinte një fitore dërrmuese në zgjedhje, të cilat vendet perëndimore i cilësuan si as të lira dhe as të drejta.
Në një deklaratë të përbashkët të shtunën, Britania, Franca, Gjermania, Suedia dhe Holanda thanë se analizat e mostrave nga trupi i Navalnyt konfirmonin “përfundimisht” praninë e epibatidinës, një toksinë që gjendet te bretkosat helmuese në Amerikën e Jugut dhe që nuk gjendet natyrshëm në Rusi.
Zëdhënësi i Kremlinit, Dmitry Peskov, u ka thënë gazetarëve të hënën se Moska i sheh me shumë negativitet akuzat evropiane, të cilat ai i quajti të rreme.
Edhe
Rusia u kërkon vendeve evropiane prova për akuzat se ka vrarë Navalnyn
“Natyrisht, ne nuk i pranojmë akuza të tilla. Nuk pajtohemi me to. I konsiderojmë të njëanshme dhe të pabazuara. Dhe, në fakt, i hedhim poshtë me vendosmëri”, ka thënë Peskov.
Autoritetet ruse, të cilat e kanë shpallur lëvizjen e Navalnyt si ekstremiste, më parë kanë hedhur poshtë akuzat nga e veja e tij, Yulia Navalnaya, se shteti e kishte vrarë atë, duke thënë se ai vdiq për shkaqe natyrore.
