387 pasagjerët në bordin e fluturimeve nga Singapori dhe Toronto e Kanadasë nuk iu nënshtruan testeve të COVID-19 në mbërritje dhe nuk u desh të kalonin pesë ditë karantinë në objektet e centralizuara qeveritare. Lehtësimi i kufizimeve për udhëtimet e huaja shënon heqjen dorë përfundimisht prej politikës së rreptë të Kinës
Pekin, 8 janar (AJ) - Kina ka hequr kufizimet pandemike për udhëtimet ndërkombëtare, duke u dhënë fund kërkesave për karantinë për udhëtarët në hyrje dhe bashkë me të, gati tre vjet izolim të vetimponuar.
Pasagjerët e parë që mbërritën sipas rregullave të reja u ulën në aeroportet në qytetet jugore Guangzhou dhe Shenzhen vetëm pas mesnatës të së dielës, sipas Rrjetit Global të Televizionit të Kinës (CGTN) në pronësi shtetërore.
387 pasagjerët në bordin e fluturimeve nga Singapori dhe Toronto e Kanadasë nuk iu nënshtruan testeve të COVID-19 në mbërritje dhe nuk u desh të kalonin pesë ditë karantinë në objektet e centralizuara qeveritare.
Zbutja e masave
Lehtësimi i kufizimeve për udhëtimet e huaja shënon heqjen dorë përfundimisht prej politikës së rreptë të Kinës "zero-COVID".
Edhe
Nga abuzimi te shpresa: lufta e grave kundër martesave të detyruara në Kinë
Pekini filloi davaritjen e strategjisë së ashpër të karantinave të detyrueshme, bllokimeve rraskapitëse dhe testimeve të shpeshta pas protestave historike kundër kufizimeve muajin e kaluar. Por ndryshimet e papritura kanë ekspozuar shumë nga popullsia e saj prej 1.4 miliard banorësh ndaj virusit për herë të parë, duke shkaktuar një valë infeksionesh që po pushton disa spitale, duke zbrazur raftet e farmacive me ilaçe dhe duke shkaktuar radhë të gjata në krematoriume.
Heqja e rregullave të karantinës hap në mënyrë efektive derën për shumë kinezë që të shkojnë jashtë vendit për herë të parë që kur kufijtë u mbyllën gati tre vjet më parë, pa frikën se do të duhet të izolohen në objektet qeveritare pas kthimit të tyre.
Kufijtë e Kinës mbeten të mbyllur për turistët, megjithatë, me të huajt që lejohen të udhëtojnë në vend vetëm për vizita biznesi ose familjare.
Katrina Yu e Al Jazeera, duke raportuar nga Pekini, tha se për shumë njerëz në Kinë, e diela shënoi "fundin e vërtetë të politikës ‘zero-COVID’”.
“Kjo për shkak se, para ditës së sotme, ishte e pamundur të largohesh dhe të hyje në Kinë pa pasur nevojë të kalosh karantinë në objektet qeveritare dhe në shtëpi. Kështu që njerëzit ndihen shumë të emocionuar dhe mjaft të çliruar për të shkuar e për të udhëtuar jashtë vendit”, tha ajo. “Sajtet e njohura të udhëtimit thonë se kërkimet për fluturime në dalje janë rritur me rreth 80 për qind krahasuar me këtë kohë të vitit të kaluar, dhe destinacioni i preferuar ishte Tajlanda. Të tjerat përfshijnë Japoninë, Korenë e Jugut, SHBA-në dhe Australinë”, shtoi ajo.
Testet e detyrueshme
Por rritja e pritshme e vizitorëve ka bërë që më shumë se një duzinë vende të vendosin teste të detyrueshme për COVID-19 për udhëtarët nga Kina, duke përmendur shqetësimet për "nënprezantimin" e infeksioneve dhe vdekjeve nga sëmundja, si dhe potencialin për shfaqjen e nënvarianteve të reja dhe më virulente të koronavirusit.
Edhe
Tajlanda shtrëngon rregullat e vizave për turistët
Pekini i ka quajtur kufizimet e udhëtimit "të papranueshme".
Pavarësisht nga kërkesat e testimit, 28-vjeçari Zhang Kai i tha agjencisë së lajmeve AFP se po planifikon një udhëtim ose në Korenë e Jugut ose në Japoni.
"Jam i lumtur, tani më në fund mund të dal", tha Zhang.
Miqtë e tij tashmë kanë zbritur në Japoni dhe u janë nënshtruar testeve, tha ai, duke e hedhur poshtë kërkesën e testimit si një "çështje të vogël".
Në Tokio, karikaturisti Masashi Higashitani tha se ishte i ngazëllyer për rihapjen e Kinës. Por ai pranoi disa shqetësime.
“Pyes veten nëse një fluks i shumë prej tyre mund të mbizotërojë kapacitetin tonë. Unë jam gjithashtu i shqetësuar se duhet të jemi më të kujdesshëm në lidhje me masat antivirus”, tha ai.
Ekspertët thonë se ndërsa shqetësimet për udhëtarët nga Kina ishin të kuptueshme, duke pasur parasysh shkallën e zbutjes së përnjëhershme të masave në vend, gjasat që pasagjerët kinezë të shkaktojnë një rritje të infeksioneve në vendet që vizitojnë ishin minimale.
Edhe
Kina konfirmon planin për blerjen e 200 avionëve Boeing nga SHBA-ja
"Njerëzit kanë arsye të shqetësohen për volumin e lartë të udhëtarëve nga Kina", tha Yanzhong Huang, bashkëpunëtor i lartë për shëndetin global në Këshillin për Marrëdhëniet me Jashtë, një institut me bazë në Shtetet e Bashkuara.
"Por unë nuk mendoj se është e arsyeshme t'i shikojmë këta pasagjerë si të sëmurë ose të rrezikshëm”, i tha ai “Al-Jazeeras”. “Deri më tani, nuk ka asnjë provë për shfaqjen e nënvarianteve të reja nga Kina. Dhe duke qenë se shumica e këtyre vendeve të destinacionit kanë mësuar të ekzistojnë me virusin, fluksi i vizitorëve kinezë nuk do të çojë në një rritje të rasteve në ato vende.
