Orange County në Kaliforninë Jugore ka ngritur në qiell dronët në betejë kundër mushkonjave dhe sëmundjeve që përhapin ato te njerëzit.
Fluturakja e vogël përdoret për mbikëqyrje dhe për të hedhur karrem me granulë ose larvicid të lëngshëm në këneta, ligatina, pellgje të mëdha dhe parqe, mirëpo jo edhe nëpër lagje.
Piloti i dronëve John Savage thotë se dronët janë shumë më preciz ndaj mushkonjave.
“Sot kemi spërkatur me sistemin tonë në këneta për kontrollin e mushkonjave. Përdorim një lëng. Ka ndihmuar shumë në reduktimin e mushkonjave”, ka thënë ai.
Ai ka thënë se ka edhe më shumë mushkonja shkaku i shiut. Dhe sivjet shi ka pasur me bollëk.
Mushkonjat shumohen nga vezët e vendosura në ujë, duke bërë përhapjen e tyre shqetësim të madh për njerëzit pas dimrit shumë të lagësht të Kalifornisë.
Metodat tradicionale të trajtimit kundër mushkonjave përfshinin përdorimin e çantave të shpinës, automjetet, aeroplanët dhe helikopterët.
Betejën kundër mushkonjave tani e kanë nën kontroll dronët, më shumë se kurrë më parë.
Përparësitë që ofrojnë dronët përfshijnë zbulimin e shpejtë të mushkonjave dhe trajtimin preciz ndaj tyre. Kështu, është eliminuar dëmtimi i tokave të ndjeshme që bëhej me lëvizjen e automjeteve apo edhe me hedhjen e lëngjeve nga aeroplanët e helikopterët.
“Larvat e mushkonjave janë ushqyes filtrash, kështu që ato ushqehen me bakteret. Ajo hyn në zorrët e tyre dhe është rregullator i rritjes. Pra, në thelb - nëse keni parë filmin ‘Alien’, ai fryn stomakun. Kështu që kjo është mënyra më e mirë për të përshkrua”.
Operatori i dronëve duhet të ketë leje për pilotim nga distanca.
Sëmundjet nga mushkonjat për një kohë të gjatë njihen si kërcënim për shëndetin publik dhe ky shqetësim është duke u rritur.
Autoriteti i Bashkimit Evropian për parandalimin e sëmundjeve gjatë muajit qershor ka tërhequr vërejtjen se ngrohja e shkaktuar nga ndryshimet klimatike ka rritur mundësinë e përhapjes së sëmundjeve të shkaktuara nga mushkonjat.
Gjatë kësaj jave janë raportuar pesë raste të malaries në Florida dhe Teksas. Rastet e para në 20 vjetët e fundit.
Ndërkaq virusi i Nilit të Perëndimit është konfirmuar në 7 mijë e 500 raste ndërkaq, që prej vitit 2003 ka lënë të vdekur më shumë se 300 persona.