Ushtria izraelite ka intensifikuar sulmet e saj ajrore gjatë së shtunës dhe së dielës. Cak i sulmeve kanë qenë objektivat në të gjithë Gazën, dy aeroporte në Siri, si dhe një xhami në Bregun e pushtuar Perëndimor, që dyshohet se po përdorej nga militantët e Hamasit. Ndonëse një kolonë e dytë kamionësh me ndihma ka kaluar të dielën nga Egjipti në Rripin e Gazës, gjendja në spitale vazhdon të jetë kritike
(AP) - Izraeli ka konfirmuar se ka kryer një sulm ajror në kampin e refugjatëve Jenin në Bregun e pushtuar Perëndimor, gjatë 24 orëve të fundit.
Ushtria e Izraelit bëri të ditur të dielën se e ka goditur një qelizë të grupit militant, Hamas, që dyshohet se ishte strehuar në një xhami në Bregun e uzurpuar Perëndimor, si dhe paralajmëroi se do t’i ashpërsojë bombardimet në Rripin e Gazës së udhëhequr nga Hamasi.
Sulmi ajror kishte në shënjestër xhaminë Al-Ansar, e cila ndodhet në kampin e refugjatëve Jenin, e cila sipas Forcave të Mbrojtjes të Izraelit, po përdorej nga Hamasi dhe militantët e Xhihadit Islamik.
IDF-ja e përshkroi këtë vend si “kompleks terrorist” që po përdorej për të planifikuar sulme. Dy persona janë konfirmuar të vdekur.
Media shtetërore siriane ndërkohë, raportoi se sulmet ajrore izraelite kanë shënjestruar edhe aeroportet ndërkombëtare në kryeqytetin Damask dhe qytetin verior të Alepos.
Sipas raportimeve, një person ka mbetur i vdekur, si dhe pistat janë dëmtuar.
Izraeli rrallë i pranon sulmet individuale, por ka thënë se vepron për të parandaluar Hezbollahun dhe grupet e tjera militante që të sjellin armë nga Irani, shtet ky që gjithashtu mbështet Hamasin.
Dhjetëra mijëra izraelitë po evakuohen gjithashtu nga qytetet afër kufirit verior të vendit me Libanin mes përleshjeve në rritje midis ushtrisë izraelite dhe Hezbollahut.
Në 24 orët e fundit, 14 komunitete janë urdhëruar të evakuohen, në strehim të përkohshëm të financuar nga shteti izraelit.
Në Liban, grupi Hezbollah bëri të ditur se gjashtë nga luftëtarët e tij u vranë të shtunën dhe nënkryetari i grupit, Sheikh Naim Kassem, paralajmëroi se Izraeli do të paguaj shtrenjtë nëse fillon ofensivë tokësore në Gaza.
Bombardimet izraelite në Rripin e rrethuar të Gazës kanë vazhduar pareshtur edhe mbrëmjen e së shtunës dhe mëngjesin e së dielës.
Ministria e Shëndetësisë e Palestinës ka njoftuar se numri i të vdekurve në Gaza ka arritur në 4.651 persona. Mbi 14 mijë të tjerë janë të plagosur.
Të dielën ka kaluar një kolonë e dytë kamionësh me ndihma nga Egjipti në Rripin e Gazës.
Një total prej 17 kamionësh kanë hyrë në Gaza, një ditë pasi karvani i parë i përbërë nga 20 kamionë transportoi ndihma mjekësore, ushqim dhe ujë.
Situata mbetet kritike. OKB-ja thotë se furnizimet mjekësore dhe karburanti për gjeneratorët po mbarojnë, duke i detyruar mjekët që të kryejnë operacione pa anestezion, me gjilpëra qepëse e duke përdorur uthullën si dezinfektues.
OKB-ja vlerëson se rreth 100 kamionë në ditë duhet të hyjnë në Gaza për të plotësuar nevojat e popullsisë, prej 2.3 milionë banorësh.
Përgatiti: Forca Jashari