Gjeorgjianët festojnë në rrugë pasi morën statusin e vendit kandidat në BE

Dhjetëra mijëra njerëz u mblodhën të premten në Tbilisi për të festuar që vendi i tyre mori statusin e vendit kandidat për pranim në Bashkimin Evropian, të cilin ata e shohin si mbrojtje nga Rusia fqinje, shkruan AP.

Me flamuj gjeorgjian dhe të BE-së, qytetarët u mblodhën në sheshin në qendër të Tbilisit.

Të enjten, liderët e BE-së vendosën t'i japin Gjeorgjisë statusin e kandidatit për pranim, të cilin vendi e ka kërkuar që nga fillimi i pushtimit rus të Ukrainës në shkurt 2022.

Presidentja properëndimore Salome Zourabishvili përshëndeti vendimin e BE-së dhe vuri në dukje se anëtarësimi në BE është “vullneti i palëkundur i popullit gjeorgjian”.

Lufta në Ukrainë ka shkaktuar shqetësim serioz në Gjeorgji, një ish-republikë sovjetike që u pushtua nga trupat ruse në vitin 2008.

Në qershor 2022, BE-ja i dha vetëm Ukrainës dhe Moldavisë statusin e kandidatit për pranim dhe kërkoi nga Gjeorgjia reforma gjyqësore dhe zgjedhore, më shumë liri për mediat dhe më pak pushtet për oligarkët.

Edhe Botë 9 dhj 2023 Gjeorgjianët me marsh përkrahin anëtarësimin në BE

Anëtarësimi në Bashkimin Evropian është synim i përcaktuar në Kushtetutën e Gjeorgjisë dhe, sipas sondazheve, 80 për qind e qytetarëve e mbështesin atë.