Danimarka zgjeron rekrutimin ushtarak për gratë për herë të parë

Duke parë përmes një shtrirjeje të dendur pyjore jashtë kryeqytetit të Danimarkës, 20-vjeçarja Katrine vëzhgon për kërcënime që afrohen.

Pas gati katër muajsh stërvitjeje ushtarake, ushtarja e re dhe pjesa tjetër e njësisë së saj kaluan fillimin e qershorit duke përfunduar stërvitjet e tyre të fundit pranë kazermave të ushtrisë daneze në Hovelte, 25 kilometra në veri të Kopenhagenit.

Katrine dhe ushtare të tjera gra, të cilat të gjitha folën me Associated Press më 11 qershor me kusht që të përdoren vetëm emrat e tyre për shkak të sigurisë operative, u ofruan vullnetare për shërbim ushtarak në fillim të këtij viti. 

Deri më tani, kjo ishte e vetmja mënyrë që gratë lejoheshin të merrnin pjesë në shërbimin ushtarak, megjithëse gratë kanë qenë në gjendje të regjistrohen si anëtare me kohë të plotë të forcave të armatosura që nga fillimi i viteve 1970.

Vendi skandinav po kërkon të rrisë numrin e të rinjve në ushtri duke zgjeruar rekrutimin e detyrueshëm për gratë për herë të parë. Vendet e mbetura bosh parashihet të mbushen nga një llotari rekrutimi.

“Në situatën në të cilën ndodhet bota tani, kjo është e nevojshme”, ka thënë Katrine. 

"Mendoj se është e drejtë që gratë të marrin pjesë në mënyrë të barabartë me burrat”.

Sipas rregullave të reja të miratuara nga parlamenti i Danimarkës në fillim të qershorit, gratë daneze që mbushin 18 vjeç pas të martës, do të futen në sistemin e llotarisë, në kushte të barabarta me bashkatdhetarët e tyre meshkuj. Ndryshimi vjen në një sfond të agresionit rus dhe investimeve ushtarake në rritje në të gjitha vendet e NATO-s.

Reformat e barazisë gjinore të Danimarkës u përcaktuan fillimisht në vitin 2024 si pjesë e një marrëveshjeje të madhe mbrojtëse. Programi fillimisht pritej të zbatohej deri në fillim të vitit 2027, por do të nisë më herët, në verën e vitit 2025.

Kolonel Kenneth Strom, kreu i programit të rekrutimit, i ka thënë AP-së se masa bazohet në "situatën aktuale të sigurisë".

"Rritja e numrit të rekrutëve, kjo thjesht do të çonte në më shumë fuqi luftarake”, ka thënë Strom.

Danimarka, një komb me 6 milionë banorë, ka rreth 9,000 trupa profesionale. Marrëveshja e re pritet ta çojë shifrën deri në 6,500 persona që kryejnë shërbim ushtarak çdo vit deri në vitin 2033, nga 4,700 vitin e kaluar.

Sipas ligjit danez, të gjithë burrat mbi moshën 18 vjeç, të aftë fizikisht, thirren për shërbim ushtarak. Disa njerëz, si burra ashtu edhe gra, ofrohen vullnetarë, dhe pjesa tjetër e vendeve plotësohet nga një sistem llotarie që deri më tani ka përfshirë vetëm burra. Vullnetaret femra përbëjnë afërsisht një të katërtën e grupit të vitit 2024.

Kohëzgjatja e shërbimit po zgjatet gjithashtu, nga katër në 11 muaj. Rekrutët së pari do të kalojnë pesë muaj në trajnim bazë, të ndjekur nga gjashtë muaj shërbim operativ, plus mësime shtesë.