Botë

Blinken: SHBA-ja synon zgjatjen e ujdisë bërthamore me Iranin

Sekretari amerikan i Shtetit, Anthony Blinken, ka bërë të ditur të hënën se Shtetet e Bashkuara do të synojnë fuqizimin dhe zgjatjen e marrëveshjes midis fuqive botërore dhe Iranit për frenimin e programit bërthamor të vendit.

Agjencia e OKB-së për mbikëqyrje bërthamore ka njoftuar më herët se ka arritur ujdi me Iranin për zbutjen e ndikimit të hapave që Teherani planifikon t’i ndërmarrë këtë javë, përfshirë përfundimin e inspektimeve.

Dy palët është raportuar se kanë arritur pajtim për vazhdimin e monitorimeve të domosdoshme edhe tre muaj të tjerë. Blinken, duke folur gjatë një konference për çarmatimin në Gjenevë, ka thënë se SHBA-ja vazhdon të jetë e përkushtuar që t’ia pamundësojë Iranit sigurimin e një arme të synuar bërthamore. Ai ka thënë se për arritjen e këtij qëllimi diplomacia është mënyra më e mirë.