Belgjika ka ndjekur shtetin fqinj Francën të premten, duke vendosur për shtrëngim të masave anti-COVID për të mbajtur nën kontroll përhapjen e virusit dhe për të parandaluar valën e tretë të infektimeve.
Kryeministri belg Alexander De Croo ka bërë të ditur në një konferencë për media se është pritur rritje e numrit të rasteve me COVID-19 gjatë muajit mars, mirëpo siç ka thënë, kjo rritje ishte më e shpejtë se që ishte parashikuar, sidomos në shkolla dhe vende të punës.
“Është e qartë se kemi javë vendimtare para nesh. Sado që do të dëshironim, koronavirusi nuk është larguar ende”, është shprehur De Croo gjatë konferencës, raportojnë mediat e huaja.
Sipas tij, tashmë janë anuluar planet për të rihapur parqet dhe për të lejuar sportet amatore të nisin punën nga 1 prilli.
Belgjika po planifikonte të rihapte restorantet, kafiteritë, qendrat e fitnesit dhe kinematë më 1 maj, pas pesë muajsh masash të rrepta.
Edhe
Belgjika me masa të reja kufizuese për shkak të Omicronit
Kryeministri De Croo ka kërkuar nga qytetarët belgë që të kufizojnë sa më shumë kontaktet.
Rastet ditore në Belgjikë janë rritur për 34 % nga java e kaluar. Sipas të dhënave zyrtare, më shumë se 22 mijë persona kanë vdekur në këtë shtet si pasojë e COVID-19 që nga fillimi i pandemisë mirëpo tani numri i vdekjeve ka filluar të bie për shkak të vaksinimit.
