Shefi për Politikë të Jashtme i Bashkimit Evropian, Joseph Borrell, ka bërë thirrje të premten për arritjen e marrëveshjes që do t’i pamundësonte ambiciet e Iranit për zhvillimin e armëve bërthamore.
Ai ka thënë se muajt e ardhshëm ofrojnë një mundësi që nuk duhet humbur, për t’i rikthyer Iranin dhe Shtetet e Bashkuara në marrëveshjen prej së cilës presidenti i mëparshëm Donald Trump ishte tërhequr, duke nxitur sanksione të ashpra ekonomike ndaj zyrtarëve iranianë.
Britania e Madhe, Franca dhe Gjermania janë përballur me vështirësi në mbajtjen gjallë të ujdisë, teksa, me të ardhur në detyrë, presidenti Joe Biden ka shprehur synimin që SHBA-ja të kthehet në marrëveshjen ndërkombëtare të arritur më 2015. Irani ka paralajmëruar kthimin vetëm në rast se SHBA-ja i heq të gjitha sanksionet e vendosura.