BE-ja arrin marrëveshje për t'u çliruar nga varësia ndaj karburanteve fosile ruse

Bashkimi Evropian ka bërë një hap përpara drejt çlirimit nga varësia e tij prej importeve ruse të karburanteve fosile dhe diversifikimit të furnizimeve të tij me energji, shkroi të mërkurën “Euronews”.

Përfaqësuesit nga Parlamenti Evropian dhe Këshilli Evropian kanë arritur marrëveshje të përkohshme në mëngjesin e së mërkurës për të lejuar vendet e BE-së të shtojnë kapitullin e quajtur “REPowerEU”, në planet e tyre kombëtare të rimëkëmbjes dhe elasticitetit pas COVID-it.

“REPowerEU” është një plan i zbuluar në maj nga Komisioni në përgjigje të luftës së Rusisë kundër Ukrainës për të përdorur 225 miliardë euro para të pashpenzuara, fillimisht të destinuara për të ndihmuar ekonomitë e bllokut të rimëkëmben nga rënia e tyre për shkak të koronavirusit, për të përshpejtuar tranzicionin e energjisë dhe për të diversifikuar furnizimet me energji larg Rusisë.

Marrëveshja do t'u mundësojë kryeqyteteve anembanë bllokut të marrin fonde thelbësore për investimet dhe reformat kryesore që mbështesin tranzicionin e energjisë dhe rritjen e elasticitetit të sistemit energjetik të BE-së.

"Ne realizuam atë që premtuam. REPowerEU do të hyjë në fuqi në fillim të vitit të ardhshëm. Përfunduam me sukses negociatat midis Parlamentit Evropian dhe Këshillit mbrëmë”, ka thënë Siegfried Muresan, zëvendëskryetar i Grupit PPE për Buxhetet dhe Politikat Strukturore. "Me 20 miliardë euro fonde të reja, REPowerEU do të mbështesë shtetet anëtare në reduktimin e varësisë së tyre nga karburantet fosile ruse. Gjithashtu do të përshpejtojë kalimin në energjinë e rinovueshme”, ka shtuar ai.

Rreth 30 për qind e fondeve të përfshira në planin REPowerEU do të caktohen për projekte ndërkufitare, pasi BE-ja dëshiron të krijojë një "Union Energjetik" të pavarur dhe autonom.