Pasi zyrtarët sauditë dhe izraelitë filluan të flasin gjithnjë e më hapur për normalizimin e marrëdhënieve midis dy vendeve në javët e fundit, duket se hapat e parë drejt kësaj po realizohen.
Përkatësisht, ministri i Turizmit i Izraelit, Haim Katz, mbërriti të martën në Arabinë Saudite për konferencën e Kombeve të Bashkuara, duke u bërë kështu ministri i parë izraelit që udhëheq një delegacion izraelit në Arabinë Saudite.
Sipas mediave izraelite, Katz do të kalojë dy ditë në Arabinë Saudite në kuadër të aktivitetit të Organizatës Botërore të Turizmit të OKB-së.
“Turizmi është një urë lidhëse midis kombeve. Bashkëpunimi në fushën e turizmit ka potencial për të lidhur zemrat dhe përparimin ekonomik. Unë do të punoj për të përmirësuar bashkëpunimin, turizmin dhe marrëdhëniet e jashtme të Izraelit", ka thënë Katz.
Vizita e Katzit vjen pasi Izraeli dhe Arabia Saudite duket se po i afrohen një marrëveshjeje për normalizimin e marrëdhënieve.
Kryeministri izraelit Benjamin Netanyahu gjatë fjalimit të tij në OKB ka thënë se Izraeli është në prag të një marrëveshjeje historike me Arabinë Saudite.
Gjithashtu, princi i Kurorës Saudite Mohammed bin Salman deklaroi se vendet po afrohen çdo ditë e më shumë në marrëdhënie dhe theksoi se çështja palestineze është ende jashtëzakonisht e rëndësishme në të gjithë procesin.
© KOHA. Të gjitha të drejtat janë të rezervuara.
