Lideri i Koresë së Veriut, Kim Jong-un, ka deklaruar përkrahjen e tij për Rusinë duke thënë se ushtria ruse dhe populli i saj do të sigurojnë fitore të madhe në Ukrainë.
Në takimin me presidentin rus, Vladimir Putin, diktatori veri-korean ka thënë se Rusia do të jetë fitimtare në fushën e betejës dhe se në të ardhmen do të jetë shtet shumë i fuqishëm.
Gjatë darkës formale të organizuar nga Putini në bazën ruse në Lindjen e Largët, dy shtetet janë pajtuar që të zhvillojnë marrëdhënie strategjike për të mbrojtur sovranitetin e tyre.
Putini ka thënë se ka mundësi të bashkëpunimit ushtarak mes Rusisë dhe Koresë së Veriut.
Muaj më parë, mediat ndërkombëtare kanë raportuar se Rusia i ka kërkuar armatim Koresë së Veriut për shkak të vështirësive në prodhimin e armatimit të vet.
Shteti diktatorial në këmbim do të marrë teknologjitë e avancuara të Rusisë.
Kim Jong-Un ka thënë se gjithmonë do t’i përkrahë vendimet e Putinit dhe se janë bashkë në betejën e tyre kundër imperializmit.
Takimi i dy liderëve ka shpërfaqur interesin e tyre për t’u bashkuar teksa po përballen me konfrontime të ndara me Shtetet e Bashkuara të Amerikës.
Me Rusinë për shkak të luftës që ka nisur në Ukrainë, ndërkaq me Korenë e Veriut për zhvillimin e programit bërthamor.
