Ish-presidenti amerikan, Donald Trump, do të përballet me shtatë akuza penale në lidhje me menaxhimin e dokumenteve sekrete pas largimit nga Shtëpia e Bardhë.
Trumpi përballet me akuza që kanë të bëjnë me mbajtjen e paautorizuar të dokumenteve të klasifikuara. Kjo është hera e dytë që Trumpi përballet me akuza dhe hera e parë që ka një hetim federal për ish-presidentin.
Ndërkaq ai ka vazhduar të bëjë fushatë për kthimin në Shtëpinë e Bardhë me zgjedhjet presidenciale të vitit 2024. Ekspertët kanë thënë se akuzat nuk do t’ia bllokojnë përpjekjet për të garuar përsëri për president.
Në një postim në rrjetin e vet social, Trumpi përsëriti se është i pafajshëm dhe se është ftuar në gjykatën federale të Miamit për të martën e javës së ardhshme. Ai do të arrestohet dhe do të dëgjojë akuzat e ngritura nga gjykata.
Ai ka thënë se nuk e ka menduar asnjëherë se një gjë e tillë mund t’i ndodhë ish-presidentit të SHBA-së. Ndërkaq përfaqësuesit e tij ligjorë kanë thënë se akuzat përfshijnë konspiracionet, deklaratat e rrejshme, pengim të drejtësisë dhe mbajtjen e jashtëligjshme të dokumenteve sekrete nën ligjin për spiunazh.
Gjatë vitit të kaluar, në vilën e tij në Mar-a-Lago të Floridas janë gjetur 11 mijë dokumente, përfshirë 100 prej tyre të vulosura si dokumente të klasifikuara. Disa prej tyre janë cilësuar si top-sekrete.
Është e kundërligjshme që zyrtarët federalë – përfshirë presidentin – të heqin ose mbajnë dokumente të klasifikuara në një lokacion të paautorizuar.
Edhe në rast se dënohet nga gjykata, Trumpi do të mund të vazhdojë garën për president.
Në fillim të muajit qershor, prokurorët amerikanë kanë siguruar audio-incizime të Donald Trumpit, në të cilat dëgjohet duke pranuar se kishte mbajtur dokumente sekrete pas largimit nga Shtëpia e Bardhë. CNN-i ka raportuar se hetuesit kishin këto audio-incizime.
Në këto audio-incizime, që besohet se janë të një takimi në klubin e golfit gjatë vitit 2021, Trumpi dëgjohet duke thënë se do të donte t’i tregonte detajet e dokumenteve sekrete, por kjo do të mund t’i shkaktonte probleme për shkak se nuk mban më postin e presidentit.
Burimet kanë thënë për rrjetin televiziv CBS se kishte masa të sigurisë kombëtare për shkak se dokumentet tregonin për një sulm të mundshëm ndaj Iranit. Ndërkaq, në audio-incizime Trumpi dëgjohet duke thënë se këto dokumente do të duhej të publikoheshin para se të largohej nga posti i presidentit. Mbetet e paqartë nëse Trumpi i kishte dokumentet gjatë takimit në klubin e golfit apo vetëm po diskutonte rreth tyre me këshilltarët e tij.
Përktheu: Gent Mehmeti
© KOHA. Të gjitha të drejtat janë të rezervuara.
