Rreth 12 vjet më parë, Abdel-Karim Abu Jalhoum ka ikur nga lufta dhe varfëria në Rripin e Gazës duke u strehuar në Turqi. Por, tërmetet që shkatërruan një pjesë të Turqisë dhe Sirisë të hënën, e vranë atë dhe gjithë familjen e tij.
Ministria palestineze e Punëve të Jashtme ka njoftuar se Abu Jalhoum, gruaja e tij Fatime dhe katër fëmijët e tyre, janë në mesin e 70 palestinezëve që kanë vdekur nga tërmeti i 6 shkurtit, raportoi të mërkurën “Al Jazeera”.
"Vëllai im shkoi në Turqi për të kërkuar një jetë më të mirë larg luftërave dhe bllokadave këtu në Gaza”, ka thënë vëllai 43-vjeçar i Abu Jalhoumit, Ramzy, derisa të afërmit dhe fqinjët hynë në shtëpinë e familjes në qytetin Beit Lahiya në Rripin verior të Gazës për të bërë nderime.
“Ne humbëm familjen. Një familje e tërë u fshi nga regjistri i gjendjes civile”, shtoi ai.
