Presidenti Vladimir Putin ka krahasuar pushtimin e Ukrainës me luftën kundër Gjermanisë naziste në fjalimin për të shënuar 80-vjetorin e Betejës së Stalingradit. Duke cituar vendimin e Gjermanisë për të dërguar tanket “Leopard” në Ukrainë, presidenti rus ka pohuar se historia po përsëritet.
“Është e pabesueshme, por e vërtetë. Ne përsëri po kërcënohemi nga taket gjermane ‘Leopard’”, ka thënë Putini.
Gjermania është një prej shumë shteteve që janë duke ndihmuar Ukrainën të mbrojë territorin e saj. Rusia ka nisur pushtimin e plotë të këtij shteti para një viti, duke nxitur shtetet perëndimore që të dërgojnë armë dhe ndihma për qeverinë ukrainase.
Duke folur në Volgograd, emri modern i Stalingradit, Putini, ka paralajmëruar se mund të shkojë përtej armëve konvencionale.
“Ata që shpresojnë se do të mposhtin Rusinë në fushëbetejë me sa duket nuk e kuptojnë që lufta moderne me Rusinë do të jetë e vështirë për ata”, ka thënë presidenti rus.
“Nuk po dërgojmë tanket tona në kufijtë e tyre, por kemi kapacitet që të reagojmë. Nuk do të jetë i kufizuar vetëm në përdorimin e armatimit të lehtë. Duhet ta kuptojnë këtë”, ka shtuar 70-vjeçari Putin.
Putini ishte në Volgograd për të shënuar përvjetorin e fundit të Betejës së Stalingradit, që ishte vendimtare në Luftën e Dytë Botërore. Në këtë betejë Rusia kapi 91 mijë ushtarë gjermanë dhe ktheu luftën në favor të vetin.
Më shumë se 1 milion njerëz u vranë në këtë betejë, më të përgjakshmen në Luftën e Dytë Botërore.
Gjatë luftës në Ukrainë, Putini rrejshëm ka tentuar ta prezantojë pushtimin si luftë kundër nacionalistëve dhe nazistëve, të cilët sipas tij, po drejtojnë qeverinë e Kievit. Kësaj ideje i është kthyer edhe një herë në Stalingrad.
“Tani, fatkeqësisht, po shohim se ideologjia e nazizmit, nën petkun modern, përsëri ka krijuar kërcënime për sigurinë e shtetit tonë. Edhe një herë jemi të detyruar të dëbojmë agresionin e Perëndimit”, ka thënë Putini.
Por ai është zotuar, duke thënë se është “e pabesueshme, por e vërtetë” se Rusia po kërcënohej përsëri nga tanket gjermane, por ka shtuar se Moska kishte një përgjigje për çdo vend që e kërcënonte atë.
Volgograd u riemërua përkohësisht në Stalingrad për ditën për të shënuar këtë rast, dhe në fillim të kësaj jave u zbulua busti i ri i ish-udhëheqësit sovjetik Joseph Stalin.
Stalini - i cili udhëhoqi Bashkimin Sovjetik midis 1924 dhe vdekjes së tij në 1953 - u akuzua për orkestrimin e urisë së bukës në Ukrainë midis viteve 1932-33.
Ngjarja - e quajtur Holodomor nga ukrainasit – la të vdekur rreth 5 milionë njerëz dhe u njoh si gjenocid në fillim të kësaj jave në Bullgari.
Putini ka vendosur lule te varri i mareshalit sovjetik që mbikëqyri mbrojtjen e qytetit dhe vizitoi kompleksin kryesor memorial ku mbajti një minutë heshtjeje për ata që vdiqën në betejë.
Pretendimet ukrainase
Ministri ukrainas i Mbrojtjes ka thënë se Rusia është duke u përgatitur për ofensivën e re, e cila sipas tij, do të nisë jo më larg se 24 shkurti.
Oleksii Reznikov ka thënë se Moska ka tubuar mijëra trupa dhe mund të nisë sulmin në njëvjetorin e fillimit të pushtimit. Reznikov ka thënë se Rusia ka mobilizuar 500 mijë trupa për ofensivën e mundshme të muajit shkurt.
Ndërkaq, presidenti ukrainas, Voldymyr Zelenskyy, ka përsëritur thirrjet për furnizim me aeroplanë luftarakë me qëllim që të mposhtet Rusia. Ai ka thënë se e vetmja mënyrë për të fituar luftën është duke sulmuar ushtrinë ruse me tanke, aeroplanë dhe raketa me rreze të gjatë veprimi.
Shtetet e Bashkuara të Amerikës kanë refuzuar kërkesën për aeroplanë dhe deri më tani, së bashku me Gjermaninë dhe Britaninë e Madhe, e kanë ndihmuar Ukrainën me tanke.
Ndërkaq, në muajin shtator, presidenti rus, Vladimir Putin, kishte nisur mobilizimin e përgjithshëm duke mbledhur 300 mijë trupa, të cilat sipas tij, do të ishin të nevojshëm për të siguruar integritetin territorial të Rusisë.
Mirëpo Ukraina ka insistuar se shifrat e sakta të rekrutëve që janë angazhuar në Ukrainë mund të jenë edhe më të larta.
Në javët e fundit Rusia ka raportuar për avancim në lindje të rajonit të Donbasit. Mercenarët rusë dhe ushtarët e rregullt së fundmi kanë pushtuar qytetin e Soledarit.
Ekspertët perëndimorë kanë parashikuar se Moska mund të marrë vendimin e madh për të nisur sulmin në lindje të Ukrainës.
Vizita evropiane
Ndërkohë të enjten, zyrtarë të lartë të Bashkimit Evropian kanë udhëtuar drejt Ukrainës për të forcuar marrëdhëniet dhe për të lehtësuar rrugën që një ditë Ukraina të anëtarësohet në BE, mirëpo ende ka shqetësime për korrupsionin.
Presidentja e Komisionit Evropian, Ursula von der Leyen i ka prirë ekipit prej 15 komisionerëve, të cilët kanë qëndruar në Ukrainë për të diskutuar rreth nevojave financiare, biznesit dhe energjisë dhe si ta vendosin legjislacionin e Ukrainës në vijë me standardet e BE-së.
Vizita shumë simbolike është e para e një misioni politik të BE-së. Von der Leyen dhe presidenti i Këshillit Evropian, Charles Michel, të premten do të mbajnë një takim me presidentin e Ukrainës, Volodymyr Zelenskyy.
“Fati i Ukrainës është në Evropë”, ka thënë komisioneri për buxhet, Johannes Hahn, i cili nuk udhëtoi për në Ukrainë. “Komisioni do të përkrah Ukrainën përgjatë krejt procesit të vlerësimit”.
“Përkundër sulmeve nga agresori, ne po shohim momentum në reformat për Ukrainën. “Mirëpo hyrja në BE është maratonë, jo vrapim”.
Nuk është e qartë se si do të ecin përpara reformat kur shteti është në luftë dhe ekonomia është tharë nga shpenzimet ushtarake. Është e qartë se gjërat po lëvizin. Të premten qeveria e Zelenskyyt ka vazhduar me betejën kundër korrupsionit, duke shkarkuar zyrtarë të lartë. Mirëpo misionet e BE-së që janë në Kiev që prej vitit 2014, kanë vlerësuar se do të duhen së paku 10 vjet për të eliminuar këtë problem.
© KOHA. Të gjitha të drejtat janë të rezervuara.
