India e ka miratuar vaksinën e saj të parë të hundës kundër Covidit.
Prodhuar nga Bharat Biotech, iNCOVACC jepet në formën e pikave dhe stimulon përgjigje imune në indet që rreshtojnë zgavrën e hundës.
Në shtator të vitit 2022, Kina kishte miratuar një vaksinë thithëse kundër Covidit, të administruar në formë spreji.
Shkencëtarët kanë bërë të ditur se vaksinat e hundës mund të ofrojnë imunitet të shtuar në zgavrat e hundës dhe rrugëve të sipërme të frymëmarrjes, ku Covid zakonisht hyn në trup.
Ekipet kërkimore në Mbretërinë e Bashkuar dhe SHBA kanë hetuar gjithashtu vaksinat me sprej hundor.
Në nëntor, rregullatori i drogës në Indi miratoi përdorimin e iNCOVACC si dozë përforcuese heterologe - një përforcues për njerëzit që kishin marrë më parë dy doza të Covishied ose Covaxin, dy vaksinat kryesore indiane - në situata urgjente midis të rriturve.
Në dhjetor, ajo u miratua nga rregullatori i barnave si vaksinë parësore dhe si një vaksinë e mëvonshme përforcuese tek të rriturit.
Vaksina do të kushtojë 800 rupi (10 dollarë; 8 £) për dozë në spitalet private dhe 325 rupi për dozë në spitalet qeveritare dhe mund të rezervohet në platformën online të qeverisë. Duhet të merren dy doza me një interval prej 28 ditësh.
iNCOVACC përdor një adenovirus si bartës për kodin gjenetik që i mëson trupit se si ta luftojë infeksionin. Adenoviruset e përdorura në vaksina janë transportues të padëmshëm të cilët janë modifikuar kështu që nuk mund të përsëriten ose të shkaktojnë infeksion.
Dr. Krishna Ella, kryetar i Bharat Biotech, ka bërë të ditur për agjencinë e lajmeve ANI se vaksina ishte “e lehtë për t'u marrë” pasi nuk kishte nevojë për shiringë apo gjilpërë dhe se prodhoi një përgjigje më të gjerë imune në krahasim me vaksinat e injektueshme për Covid.
India ka administruar mbi dy miliardë vaksina Covid deri më tani. Më shumë se 70% e popullsisë indiane ka marrë të paktën dy doza, sipas ministrisë federale të shëndetësisë.
Në janar 2022, India kishte nisur t’u jepte përforcues punonjësve të kujdesit shëndetësor dhe të vijës së parë, dhe atyre mbi 60 vjeç me sëmundje shoqëruese. Më vonë u zgjerua për të gjithë të rriturit. Megjithatë, ritmi i dozave përforcuese të administruara ka qenë gjithmonë shumë i ngadaltë.
Përktheu: Blerta Haxhiu
© KOHA. Të gjitha të drejtat janë të rezervuara.
