Presidenti i Ukrainës, Volodymyr Zelensky, ka thënë se Rusia po planifikon mobilizim të ri për një ofensivë të re më të madhe, raportoi të mërkurën Reuters.
Kievi zyrtar ka thënë se për javë të tëra presidenti rus, Vladimir Putin, po planifikon të urdhërojë një tjetër rekrutim masiv dhe të mbyllë kufijtë e tij për të parandaluar burrat që t’i shpëtojnë draftit.
“Ne nuk kemi asnjë dyshim se mjeshtërit aktualë të Rusisë do të hedhin gjithçka që u ka mbetur dhe këdo që mund të mbledhin në përpjekje për të kthyer valën e luftës dhe të vonojnë humbjen e tyre”, tha Zelensky në fjalimin e tij të mbajtur të martën mbrëma. "Ne duhet të prishim këtë skenar rus. Po përgatitemi për këtë. Terroristët duhet të humbasin. Çdo përpjekje për sulmin e tyre të ri duhet të dështojë”, ka shtuar ai.
Ministria ruse e Mbrojtjes fajësoi të mërkurën përdorimin e telefonit celular nga ushtarët e saj për një sulm ukrainas në natën e Vitit të Ri.
Nga ky dikaster është thënë se janë vrarë 89 ushtarakë, duke shënuar incidentin më vdekjeprurës që Moska ka pranuar për trupat e saj që nga fillimi i luftës.
Qindra mijëra burra u larguan nga Rusia kur Putini urdhëroi thirrjen e parë të rezervistëve në shtator.
Putin tha muajin e kaluar se nuk ka nevojë për mobilizim të mëtejshëm.
© KOHA. Të gjitha të drejtat janë të rezervuara.
