Dhuna ka shpërthyer në qendër të Parisit pas sulmit vdekjeprurës të së premtes ndaj komunitetit kurd të qytetit.
Protestuesit përmbysën makina, duke u vënë flakën disave dhe hodhën objekte ndaj policisë. Oficerët u përgjigjën duke hedhur gaz lotsjellës, raportoi BBC-ja të shtunën.
Tre persona u vranë në sulmin e së premtes, i cili ndodhi në një qendër kulturore kurde dhe një restorant.
I dyshuari 69-vjeçar tha më pas se ai ishte një racist që urrente të huajt, tha një burim policor për AFP.
E njëjta agjenci e lajmeve tha se burri nisi sulmin e tij me një pistoletë dhe iu gjet një kuti me të paktën 25 fishekë dhe "dy ose tre" karikatorë të mbushur.
Trazirat filluan menjëherë pas të shtënave. Pamjet treguan njerëz duke ndezur zjarre në mes të rrugës dhe duke thyer xhamat e veturave.
Policia përdori gaz lotsjellës ndërsa protestuesit u përpoqën të çanin kordonin e sigurisë.
Dhuna e së shtunës nisi pasi qindra kurdë u mblodhën paqësisht në Place de la Republique për të nderuar tre viktimat.
Policia vazhdon të marrë në pyetje burrin, një shofer treni në pension. Ai po mbahet nën dyshimin për vrasje dhe tentativë vrasjeje dhe tani përballet edhe me akuzën shtesë të veprimit me motiv racist.
