Një ish-pjesëtare e Forcave të Vetëmbrojtjes Tokësore të Japonisë ka deklaruar se ngacmimi seksual ishte aq i zakonshëm në njësinë e saj sa shihej si mënyrë komunikimi.
“Në njësinë ku bëja pjesë, ngacmimi seksual ishte aq i përhapur, sikur të ishte pjesë e komunikimit, saqë ka rezultuar me humbjen e ndjeshmërisë ndaj tij”, ka theksuar Rina Gonoi në një konferencë për media në Tokio.
Gonoi kishte paraqitur një rast ngacmimi seksual në Ministrinë japoneze të Mbrojtjes vitin e kaluar, duke thënë se ajo kishte pësuar sulme të shumta nga disa kolegë meshkuj, duke e bërë atë të hiqte dorë nga karriera e saj ushtarake.
Ushtria japoneze ka pushuar pesë ushtarakë dhe ka ndëshkuar katër të tjerë në rastin e sulmit seksual të raportuar nga Gonoi, duke nxitur hetim të rrallë në Ministrinë e Mbrojtjes që gjeti mbi 100 ankesa të tjera për ngacmim.
