Tërmeti vdekjeprurës që shndërroi në rrënoja ndërtesat në Javan Perëndimore në Indonezi, ka nxjerrë edhe një herë në pah rreziqet e jetesës në shtëpitë e ndërtuara dobët, në një nga zonat më aktive sizmike në planet.
Që nga tërmeti i së hënës, të mbijetuarit kanë fjetur në strehimore larg shtëpive, derisa priteshin edhe tërmete të tjera që mund të rrëzonin shtëpitë që tashmë ishin dëmtuar nga tërmeti prej 5.9 ballë të Rihterit, që la të vdekur të paktën 271 vetë.
Duke vizituar vendin të martën, presidenti indonezian Joko Widodo, premtoi se shtëpitë e dëmtuara, më shumë se 56 mijë prej tyre, do të rindërtohen për të qenë rezistente ndaj tërmeteve.
"Këto tërmete ndodhin çdo 20 vjet. Kështu që shtëpitë duhet të jenë rezistente ndaj tërmeteve", tha ai.
Por në një vend në zhvillim ku rreth 43% e popullsisë jeton në zonat rurale, në shtëpi kryesisht të pasigurta dhe me cilësi të dobët ndërtimi, synimi që të ndërtohen ndërtesa rezistente ndaj tërmeteve mbetet një sfidë e madhe.
Sipas Agjencisë Kombëtare për Menaxhimin e Fatkeqësive, deri të enjten e kësaj jave, më tepër se 61 mijë persona u zhvendosën si pasojë e tërmetit. / CNN
© KOHA. Të gjitha të drejtat janë të rezervuara.
