Në një intervistë për CNN, ish-kryeministri britanik Boris Johnson foli për fillimet e agresionit rus kundër Ukrainës dhe shpjegoi se si kishte mendime të ndryshme për sulmin e Rusisë midis vendeve evropiane në shkurt.
Gjatë bisedës, Johnsoni ka thënë se Franca dhe Gjermania kanë interpretime krejtësisht të ndryshme për këtë ngjarje në krahasim me vendet e tjera evropiane.
"Pikëpamja gjermane në një fazë ishte se ata thanë nëse do të kishte një pushtim, i cili do të ishte një katastrofë, atëherë do të ishte më mirë që e gjithë kjo të përfundonte shpejt dhe që Ukraina të dorëzohej. Unë mendoj se ishte një katastrofë në pikëpamjen e gjërave, por unë mund ta kuptoj pse ata menduan kështu”, ka thënë Johnson.
Si një nga arsyet pse Gjermania mendonte kështu, Johnson përmendi varësinë energjetike të vendit nga Rusia.
Një vend tjetër, qasjen e të cilit ish-kryeministri britanik e kritikoi ishte Franca.
“Mos kini dyshim, francezët i mohuan ngjarjet në terren deri në momentin e fundit”, shtoi Johnson.
Vendi i tretë të cilit ai iu referua ishte Italia, e drejtuar në atë kohë nga kryeministri Mario Draghi.
“Qeveria e tij thoshte në atë kohë se nuk do të ishte në gjendje të mbështeste qëndrimin që ne po marrim duke pasur parasysh se Italia mbështetet masivisht në burimet ruse të energjisë”, deklaroi Johnson.
Megjithatë, kur filloi agresioni, Johnson ka thënë se qëndrimet në të gjithë Evropën ndryshuan shumë shpejt.
"Ajo që ndodhi ishte se të gjithë, gjermanët, francezët, italianët, amerikanët, panë se thjesht nuk kishte alternativë tjetër. Ju thjesht nuk mund të negocioni me Putinin. Kjo është gjëja kryesore. Unë i jap meritat mënyrës se si BE-ja veproi. Sanksionet ishin të forta dhe ishte një përgjigje e përbashkët”, ka thënë ish-kryeministri i Britanisë së Madhe, Boris Johnson.
© KOHA. Të gjitha të drejtat janë të rezervuara.
