Zëdhënësi i Rusisë, Dmitry Peskov, po e konsideron hap pozitiv propozimin e shefit të Teslas, Elon Musk, për “planin e paqes” ndërmjet Ukrainës dhe Rusisë.
Të hënën mbrëma, Musk postoi në Twitter një plan katërpikësh për t'i dhënë fund luftës. Sipas Peskovit, ky plan duhet të shqyrtohet, duke shtuar se “operacioni special ushtarak” i Rusisë në Ukrainë, nuk do të përfundojë nëse Kievi i braktis negociatat, transmetoi “Newsweek” të martën.
“Ribëni zgjedhjet e rajoneve të aneksuara nën mbikëqyrjen e OKB-së. Rusia largohet nëse ky është vullneti i popullit. Krimeja njihet zyrtarisht pjesë e Rusisë, siç ka qenë që nga viti 1783 (deri në gabimin e Hrushovit). Furnizimi me ujë në Krime është i siguruar. Ukraina mbetet neutrale”, thuhet në planin e Muskut që nxiti reagime kudo në botë.
Pronari i Teslas ka thënë se qytetarët e Donbasit e Krimesë duhet lënë të vendosin nëse duan të jenë pjesë e Rusisë apo Ukrainës.
Ai tha se qytetarët e Donbasit e të Krimesë duhet të vendosin nëse duan të jenë pjesë e Rusisë apo e Ukrainës, sipas tij, siç ka vendosur Kosova.
“Ndoshta një qasje të ngjashme si me Kosovën”, ka shkruar Musk, ndërsa ka postuar shkrimin e “Britannicas” për shpalljen e pavarësisë së Kosovës.
Ndaj tij reagoi shpejtë presidenti i Ukrainës, Volodymyr Zelensky, që në Twitter, hapi një sondazh me dy opsione: Pyetja ishte “Cilin Elon Musk preferoni më tepër?”. Atë që e përkrah Ukrainën apo atë që e përkrah Rusinë.
Për afro 15 minuta pas shpalljes, në sondazh m orën pjesë afro 245 mijë veta dhe opsioni i parë mori 91 për qind të votave.
Reagime ndaj Muskut pati edhe në Kosovë, ku shumë deputetë e politikanë të ndryshëm thanë se rasti i Kosovës është i veçantë dhe se Musk ka mosnjohuri të thella kur krahasoi atë me rajonet në Ukrainë, që Rusia i ka aneksuar me forcë.
© KOHA. Të gjitha të drejtat janë të rezervuara.
