Tre shkencëtarë së bashku do të ndajnë çmimin Nobel të këtij viti në fizikë, është vendosur të martën.
Ata janë shpallur triumfues për punën e tyre në shkencën kuantike të informacionit që ka aplikime të rëndësishme, për shembull në fushën e kriptimit, raportoi Associated Press të martën.
Alain Aspect, John F. Clauser dhe Anton Zeilinger u shpallën fitues nga Akademia Mbretërore Suedeze e Shkencave për zbulimin e mënyrës se si grimcat e njohura si fotone mund të lidhen ose "ngatërrohen" me njëra-tjetrën edhe kur ato ndahen nga distanca të mëdha.
"Shkenca kuantike e informacionit është një fushë e gjallë dhe me zhvillim të shpejtë”, ka thënë Eva Olsson, anëtare e komitetit të Nobelit.
Sipas saj, parashikimet e kuantikës së informacionit kanë hapur dyert për mënyrën se si mund të interpretohen matjet.
"Ka implikime të gjera dhe të mundshme në fusha të tilla si transferimi i sigurt i informacionit, llogaritja kuantike dhe teknologjia e ndjeshmërisë. Origjina e saj mund të gjurmohet në atë të mekanikës kuantike. Parashikimet e tij kanë hapur dyert për një botë tjetër dhe gjithashtu kanë tronditur themelet e mënyrës se si ne interpretojmë matjet”, ka thënë Olsson.
Në një deklaratë për media pas njoftimit, njëri nga shkencëtarët, Zeilinger tha se ishte "ende i tronditur" kur dëgjoi se kishte marrë çmimin.
"Por është një tronditje shumë pozitive”, ka thënë Zeilinger, 77 vjeç, i cili është me qendër në Universitetin e Vjenës.
Clauser, Aspect dhe Zeilinger në vitin 2010 fituan çmimin Wolf në Izrael, çmim ky i parë si një pararendës i mundshëm i Nobelit.
© KOHA. Të gjitha të drejtat janë të rezervuara.
