New Yorku i ka dhënë fund detyrimit të mbajtjes së maskës në transportin publik për t’u mbrojtur nga COVID-19, 28 muaj pas hyrjes në fuqi të vendimit.
Lajmin e ka bërë të ditur guvernatorja, Kathy Hochul, e cila ka thënë se maskat nuk do të kërkohen më as në aeroporte apo në vetura, raportoi BBC-ja të mërkurën.
New Yorku e ka paraqitur masën në prill të vitit 2020, në kohën kur koronavirusi po përhapej me të madhe.
Guvernatorja Hochul ka thënë se tani mbajtja e maskës do të jetë opsionale, duke cituar udhëzuesin e lëshuar nga Qendrat për Kontroll dhe Parandalim të Sëmundjeve (CDC).
“Duhet ta rikthejmë normalitetin në jetët tona. Përdorimi i maskave inkurajohet por është opsional”, ka thënë Hochul.
Ajo ka shtuar se New Yorku është në një pozicion të fortë, pasi infeksionet dhe hospitalizimet kanë rënë.
Hochul ka thënë po ashtu se kërkesat për maska janë tërhequr edhe për të pastrehët dhe për të burgosurit.
Pavarësisht kësaj, ato ende kërkohen në shtëpi kujdesi, në spitale dhe në objekte të tjera të kujdesit shëndetësor.
© KOHA. Të gjitha të drejtat janë të rezervuara.
