Ukraina ka thënë se po heton më shumë se 21 mijë krime lufte dhe krime agresioni që dyshohet se janë kryer nga Rusia që nga fillimi i pushtimit të saj, shkruan BBC.
Prokurorja e Përgjithshme, Iryna Venediktova, u shpreh se po merrte raporte për 200 deri në 300 krime lufte në ditë.
Ajo pranoi se shumë procese do të mbaheshin në mungesë, por theksoi se ishte “çështje drejtësie” që të vazhdohej me ndjekjet penale.
Rusia pushtoi Ukrainën më 24 shkurt. Ajo mohon të gjitha akuzat për krime lufte.
Venediktova paralajmëroi se ushtarët rusë që vranë, torturuan ose përdhunuan civilët "duhet të kuptojnë se është vetëm një çështje kohe kur ata të gjithë do të jenë në gjykatë".
Ajo tha se megjithëse ekipi i saj po punonte në rajone anembanë Ukrainës, nuk ishte në gjendje të hetonte të gjitha rastet "si duhet dhe në mënyrë efektive" për shkak të mungesës së aksesit në disa njerëz dhe zona.
Në maj, Venediktova deklaroi se rreth 600 të dyshuar tashmë ishin identifikuar dhe 80 ndjekje penale kishin filluar.
Ushtari i parë rus që do të gjykohet në Ukrainë, Sgt Vadim Shishimarin, u dënua me burgim të përjetshëm për vrasjen e një civili në maj.
Ukraina thotë se ka zbuluar varre të shumta masive në Bucha, Borodyanka dhe qytete të tjera pranë kryeqytetit Kiev, të cilat u morën nën kontroll për një kohë të shkurtër nga trupat ruse.
Gjykata Ndërkombëtare Penale e ka përshkruar Ukrainën si një "skenë krimi", duke dërguar ekipin e saj më të madh të detektivëve në vend për të ndihmuar në hetime të shumta.
Moska ka mohuar vazhdimisht se ka shënjestruar civilët.
© KOHA. Të gjitha të drejtat janë të rezervuara.
