Rusia ka vendosur sanksione ndaj pronarit të pjesës polake të gazsjellësit Yamal si dhe njësive të Gazprom Germania, të cilat shpërndajnë gazin në Evropë dhe më gjerë, raportoi të mërkurën Reuters.
Subjektet e listuara në faqen e internetit të qeverisë ruse të mërkurën, janë kryesisht të bazuara në vendet që kanë vendosur sanksione ndaj Rusisë si përgjigje ndaj pushtimit të Ukrainës, e që shumica prej tyre janë anëtare të Bashkimit Evropian.
Një dekret i Presidentit Vladimir Putin më 3 maj përcakton se asnjë subjekt rus nuk lejohet të bëjë marrëveshje me vendet që janë në listën e sanksioneve apo edhe të përmbush detyrimet, sipas marrëveshjeve ekzistuese.
Dekreti ndalon eksportin e produkteve dhe lëndëve të para për personat dhe subjektet në këtë listë.
Agjencia ruse e lajmeve Interfax, ka raportuar se kjo listë përfshin pronarët polakë të tubacioneve EuRoPol Gaz, Gazprom Germania dhe 29 filiale të Gazprom Germania në Zvicër, Hungari, Britani, Francë, Bullgari, rajonin e Beneluksit, SHBA, Zvicër, Rumani dhe Singapor.
Gazpromi furnizon pjesën më të madhe të Evropës me gaz përmes tubacionit Yamal-Europe, dhe aktivitetet e tij brenda dhe jashtë Evropës janë thelbësore për tregun evropian të gazit dhe furnizimin e tij për industrinë dhe familjet.
© KOHA. Të gjitha të drejtat janë të rezervuara.
