Sekretari amerikan i Shtetit , Antony Blinken dhe sekretari i mbrojtjes i Shteteve të Bashkuara, Lloyd Austin, do ta vizitojnë Kievin të dielën, ka njoftuar presidenti ukrainas, Volodymyr Zelensky.
Sipas tij, kjo është vizita e parë e zyrtarëve të nivelit të lartë amerikan. Mirëpo, nuk kjo vizitë nuk është konfirmuar ende nga Uashingtoni, raportoi CNN-i.
Kjo vizitë do të ndodhë pas disa vizitave të profilit të lartë nga liderët evropianë në kryeqytetin ukrainas, si dhe pas disa lëvizjeve për rihapjen e ambasadave të zhvendosura.
Kryeministri i Ukrainës, Denys Shmyhal, në një konferencë të mbajtur në Uashington të premten, u bëri thirrje ambasadorëve nga të gjitha vendet, përfshirë Shtetet e Bashkuara, të kthehen në ambasadat e tyre në Kiev.
Javën e kaluar, sekretarja e shtypit e Shtëpisë së Bardhë, Jen Psaki, tha se nëse një zyrtar i administratës do të vizitonte Ukrainën, Shtëpia e Bardhë nuk do ta zbulonte publikisht atë informacion para kohe për shkaqe sigurie.
Zelensky do të kërkojë armë shtesë nga SHBA-ja
Presidenti i Ukrainës, Volodymyr Zelensky, do t’i presë në takim në Kiev të dielën (sot) Sekretarin Amerikan të Shtetit, Antony Blinken dhe Sekretarin e Mbrojtjes, Lloyd Austin.
Janë zyrtarët më të lartë të SHBA-së që e vizitojnë Ukrainën që kur nisi lufta më 24 shkurt.
Zelensky temë qendrore të bisedimeve pritet ta bëjë kërkesën që SHBA-ja ta furnizojë Ukrainën me më tepër armë të rënda për t’i rezistuar forcave ruse.
Ai po ashtu shpreson se vizita e sotme do të hapë rrugë për një vizitë të presidentit të SHBA-së, Joe Biden, në një të ardhme të afërt.
Shtëpia e Bardhë nuk ka komentuar për vizitën e Blinkenit dhe Austinit, mirëpo, në një intervistë për BBC, zëdhënësi i Departamentit të Shtetit, Ned Price, ka thënë se është i bindur se Ukraina do ta fitojë luftën.
“Do të jetë një fitore për Ukrainën; do të jetë humbje strategjike për Rusinë. Ajo që kemi bërë ne deri tash kemi dërguar saktësisht se çfarë kanë kërkuar partnerët tanë ukrainas për t’u mbrojtur nga agresioni rus”, tha Price.
