Forcat ruse mund të jenë duke lënë prapa dëshmi të krimeve të luftës, ndërsa po tërhiqen nga territoret rreth kryeqendrës së Ukrainës, Kievit, ka thënë këshilltari i presidentit të Ukrainës, Volodymyr Zelensky, në një intervistë për BBC të dielën.
Sergey Nikiforov i ka përshkruar imazhet nga qytetet si Bucha, Hostomel e Irpin – të tria në afërsi të Kievit – si “zemërthyese”.
Ai ka thënë se forcat ukrainase kanë gjetur varre masive, në të cilën shihen trupat e pajetë me duar dhe këmbë të lidhura, e po ashtu trupa të civilëve të ekzekutuar me plumba prapa kokës.
“Është shumë e vështirë të kuptohet pse po ndodh kjo. Është brutale. Nuk ka nevojë ushtarake për të bërë këtë”, ka thënë Nikiforov.
