Asnjë i mbijetuar nga rrëzimi i aeroplanit rus me 28 persona në bord

Asnjë nga 28 udhëtarët në bordin e një aeroplani të rrëzuar rus nuk i ka mbijetuar përplasjes fatale në rajonin e thellë lindor të vendit, kanë raportuar mediat ruse duke cituar zyrtarët e shpëtimit. Aeroplani Antonov An-26 me dy motorë fluturonte nga kryeqyteti i rajonit Petropavlovsk-Kamchatsky drejt Palanas, një fshat në veri të gadishullit të Kamchatkas, kur ka humbur kontaktin me kontrollin e trafikut ajror.

Agjencia ruse e lajmeve Interfax ka raportuar se aeroplani ishte përplasur në një shkëmb gjatë përpjekjes për aterim nën kushtet e dukshmërisë së ulët. Autoriteti rus i aviacionit civil ka konfirmuar se vendi i përplasjes së aeroplanit është gjetur, pasi që ministria e Emergjencave ka angazhuar për kërkime një helikopter dhe ekipe tokësore.

Në bordin e aeroplanit gjendeshin 22 udhëtarë dhe gjashtë pjesëtarë të ekuipazhit. Agjencia e lajmeve TASS ka raportuar se edhe kryetarja e fshatit Palana, Olga Mokhireva, ishte mes udhëtarëve. Agjencia lokale meteorologjike ka raportuar se në zonën e rrëzimit të aeroplanit mbizotëronte mot i vranët. Aeroplani raportohet se ishte ndërtuar në vitin 1982.

Një aeroplan rus i tipit An-23 është zhdukur në Kamchatka, derisa po shkonte nga Petropavlovsk në Palana. Bëhet e ditur se aeroplani ka gjashtë anëtarë të ekuipazhit dhe 22 pasagjerë.

Ministria e Mbrojtjes ruse dhe ekipet me helikopterë po përgatiten për një aksion kërkimi dhe shpëtimi.

Aeroplani humbi kontaktin me kontrollin e trafikut ajror ndërsa u përpoq të ulej, bëhet e ditur nga mediat e huaja.

© KOHA. Të gjitha të drejtat janë të rezervuara.