Hakerët që qëndrojnë prapa sulmit masiv kibernetik i cili nxiti paralizimin e shumë kompanive kanë kërkuar 70 milionë dollarë në Bitcion, për ta lëshuar atë që e quajnë “dekriptor universal”.

Këtë e kanë bërë të ditur nëpërmjet një blogu të tyre.

Firma “Kaseya”, që u ndihmon kompanive për ta menaxhuar infrastrukturën e teknologjisë informative, është goditur të premten nga sulm që besohet se është vepër e bandave të krimeve kibernetike, që janë të lidhura me Rusinë, “REvil”. Sulmi ka prekur qindra kompani në të paktën 17 shtete. Ky grup ka qenë i lidhur edhe me sulmin e kohëmëparshëm në kompaninë e përpunimit të mishit “JBS”.

Në këtë rast, “REvil” ka qenë në gjendje që t’i zhvatë 11 milionë dollarë nga firma, me anë të një pagese softuerike.

Të shtunën, presidenti amerikan Joe Biden, ka thënë se do të ketë kundërpërgjigje, po qe se hetimet tregojnë se rasti ka pasur lidhje me Kremlinin. “Kaseya”, me seli në Miami, ka njoftuar se një numër i madh i bizneseve të vogla – përfshirë ato në shërbimet financiare, udhëtim dhe agjencitë publike në të gjitha kontinentet – janë goditur nga sulmi më i fundit kibernetik.