Ndërsa Izraeli përballet me një rritje të rasteve të nxitura nga varianti Delta i COVID-19, zyrtarët shëndetësorë zbuluan se gjysma e rasteve të reja ishin midis njerëzve që ishin vaksinuar, por asnjë në gjendje të rënduar.
Njerëzit e vaksinuar me dy doza që kanë rënë në kontakt me variantin Delta do të duhet të karantinohen, ka thënë të mërkurën Chezy Levy, drejtori i përgjithshëm i Ministrisë së Shëndetit të Izraelit, raportoi Haaretz.
"Edhe pse numrat janë të ulët, fakti që kjo po arrin tek njerëzit e vaksinuar do të thotë që ne jemi ende duke kontrolluar se sa njerëz të vaksinuar gjithashtu janë infektuar", ka thënë Levy.
Levy i tha transmetuesit shtetëror Kan Bet se rreth 40% e 50% të rasteve të reja ishin njerëz që ishin vaksinuar. Shifra ka të ngjarë të jetë një vlerësim, pasi Ministria ende po analizon rastet. Të hënën, Levy ka thënë se një e treta e rasteve të reja ditore ishin njerëz që ishin vaksinuar. Gjithashtu nuk ishte e qartë nëse ata njerëz ishin vaksinuar plotësisht ose pjesërisht.
Megjithëse ato janë paraprake, shifrat nënvizojnë shqetësimin se varianti Delta mund të nënkuptojë që virusi vazhdon të përhapet edhe në vende si Izraeli ku pjesa më e madhe e popullsisë është vaksinuar.
Rastet e reja të përditshme të raportuara në Izrael janë rritur në mbi 100, numri më i lartë atje që nga maji. Rreth 70% të rasteve janë shkaktuar nga varianti Delta.
Izraeli u kishte dhënë fund kufizimeve anti-COVID – duke larguar maskat në ambiente të mbyllura javën e kaluar ndërsa rastet ditore ishin me numra njëshifror.
Që nga e enjtja, rreth 57% e popullsisë së Izraelit ishte vaksinuar plotësisht, sipas të dhënave të Universitetit Johns Hopkins.
Megjithëse infeksionet midis njerëzve të vaksinuar kanë alarmuar izraelitët, infeksionet nuk duket të jenë aq të rënda sa në njerëzit e pavaksinuar.
Që nga e hëna, asnjë rast i rëndë nga COVID-19 nuk ishte raportuar nga rritja e rasteve të fundit, ka shkruar në Twitter Ran Balicer, një ekzekutiv në organizatën izraelite të kujdesit shëndetësor Clalit.
Të hënën, Mike Ryan, drejtori ekzekutiv i programit të urgjencave shëndetësore të Organizatës Botërore të Shëndetësisë, ka thënë se varianti Delta mund të "ishte më vdekjeprurës sepse është më efikas në mënyrën se si transmeton midis njerëzve".
Dy doza të vaksinave duket se janë mjaftueshëm mbrojtëse ndaj Deltas.
Një analizë nga zyrtarët shëndetësorë në Mbretërinë e Bashkuar zbuloi se dy doza të vaksinës së Pfizer ishin 88% efektive kundër Delta ndërsa një dozë e vetme ishte 33% efektive. Kjo krahasohet me efikasitetin 95% kundër llojit origjinal, ose 52% pas një doze.
© KOHA. Të gjitha të drejtat janë të rezervuara.
