Prokurorët francezë kanë kërkuar dënimin me gjashtë muaj burgim për ish-presidentin, Nicolas Sarkozy, në rastin gjyqësor kundër tij për financimin e fushatës. Kështu ka raportuar të enjten televizioni francez BFM TV.
Të martën, Sarkozy kishte mohuar akuzat për financimin e jashtëligjshëm të fushatës së tij të dështuar për rizgjedhje më 2012, duke pretenduar se çështja e shpenzimeve nuk ishte në përgjegjësinë e tij.
Prokuroria ka bërë të ditur se partia konservatore e Sarkozysë kishte shpenzuar pothuajse dyfishin e 22.5 milionë eurove të lejuara me ligjin zgjedhor për tubimet e fushatës.
Duke i mohuar akuzat, Sarkozy ka insistuar se nuk ka qenë i përfshirë në punët logjistike të fushatës për mandatin e dytë si president i Francës.
