Vendet evropiane kanë shpërfaqur qëndrime thellësisht të ndryshme rreth administrimit apo jo të vaksinës kundër COVID-19 të “Johnson & Johnson” mes qytetarëve të tyre, si pasojë e mpiksjes së gjakut, pas rekomandimit për “pauzim” të administrimit në Shtetet e Bashkuara të Amerikës. Ndërkaq pauzimi i ngjashëm në Evropë ka goditur rëndë procesin edhe ashtu të ngadaltë të vaksinimit në kontinent, pas muajsh të tërë përballje me mungesë të furnizimeve dhe telasheve logjistike

Së pari ishte “AstraZeneca”. Tani “Johnson & Johnsoni”.

Javën e shkuar, rregullatorët britanikë dhe Agjencia Evropiane për Barna kanë njoftuar të kenë konstatuar një lidhje të mundshme midis vaksinës kundër COVID-19 të kompanisë “AstraZeneca” dhe rasteve shumë të rralla, nganjëherë fatale, të mpiksjes së rrallë të gjakut në tru.

Të mërkurën vendet evropiane kanë shpërfaqur qëndrime thellësisht të ndryshme rreth administrimit apo jo të vaksinës tjetër kundër COVID-19 të “Johnson & Johnson” mes qytetarëve të tyre, si pasojë e problematikës së njëjtë, pas rekomandimit për “pauzim” të administrimit në Shtetet e Bashkuara të Amerikës. Ndërkaq pauzimi i ngjashëm në Evropë ka goditur rëndë procesin edhe ashtu të ngadaltë të vaksinimit në kontinent, pas muajsh të tërë përballje me mungesë të furnizimeve dhe telasheve logjistike.

Derisa disa shtete anëtare të Bashkimit Evropian e vënë “në pauzë” vaksinën bazuar në rekomandimin e lëshuar në SHBA, Polonia, Franca dhe Hungaria kanë njoftuar se do ta vazhdojnë përdorimin e saj.

Vaksina e “Johnson & Johnson”, e shpërndarë në Evropë nëpërmjet “Janssenit”, është pjesë kyç e fushatës evropiane të imunizimit. Prej katër vaksinave të aprovuara deri më tani për përdorim në BE, “J&J” është e vetmja që e kërkon administrimin e vetëm një doze për efikasitet të plotë. Kjo e bën atë të përkryer për vendet që përballen me telashe në sigurim të kurave dhe më të kollajshme për administrim mes grupeve të cenueshme nga pandemia.

Por prodhuesi i saj ka vendosur të martën që t’i shtyjë dërgesat për Evropë, pasi që Administrata amerikane për Ushqim dhe Ilaçe ka rekomanduar ndërprerjen e përkohshme të përdorimit të saj deri në ekzaminimin e rasteve të mpiksjes së gjakut. Ky vendim i ka dhënë një tjetër goditje të rëndë vaksinimit në Evropë, pas kokëçarjeve me kurën e “AstraZenecas”.

E përdorimin e kësaj vaksine Danimarka e ka ndaluar plotësisht të mërkurën, në një vendim të parë të këtij lloji në të gjithë botën.

Kura e gjigantit farmaceutik anglo-suedez ka qenë e shoqëruar me telashe qysh nga miratimi për përdorim. Sipas një sondazhi të “YouGov”, të kryer gjatë muajit të kaluar, 61 për qind e francezëve, 55 për qind e gjermanëve dhe 52 për qind e spanjollëve e konsiderojnë këtë vaksinë si “të pasigurt”.

Kësisoj, pothuajse kudo përreth Bashkimit Evropian qeveritë kanë kthyer sytë nga alternativat e tjera. Vaksinat “Moderna” dhe “Pfizer”, të bazuara në teknologji të ndryshme, nuk janë ndërlidhur me efekte të ngjashme anësore.

Ndonëse të gjitha vendeve të BE-së u janë ofruar një gamë e gjerë e kurave të aprovuara – “AstraZeneca”, “Johnson & Johnson”, “Moderna” dhe “Pfizer”-“BioNTech” – shumë prej tyre kanë anashkaluar vaksinat më të kushtueshme dhe më të ndërlikuara për ruajtje, si “Pfizer” dhe “Moderna”, në fazat fillestare, duke i favorizuar në vend të tyre dozat e “AstraZenecas".

Anëtaret më të kamura të bllokut, si Danimarka, Franca, Gjermania dhe Holanda janë në pozitë më të volitshme për ta kompensuar humbjen e besimit në “AstraZeneca”, ngase kanë siguruar doza shtesë të vaksinave të tjera – veçmas “Pfizer” – nëpërmjet tregut sekondar. Mirëpo vendet si Bullgaria, Kroacia, Letonia dhe Sllovakia kanë qartazi më pak alternativa.

Shpresa për këto vende ishte që kura e “J&J” ta mbushte boshllëkun e “AstraZenecas”. Por tani Holanda ka vënë në stok rreth 80.000 dozat e pranuara të kësaj vaksine, siç kanë bërë edhe Danimarka, Kroacia dhe Rumania. Afrika e Jugut e ka pezulluar administrimin e saj si masë paraprake.

Sipas kontratës së nënshkruar me Komisionin Evropian, 200 milionë doza të saj supozohej që të arrinin në bllok brenda çerekut të dytë të këtij viti. Marrëveshja e parashihte blerjen edhe të 200 milionë dozave shtesë.

Telashet me “Johnson & Johnson” kanë ndodhur të shoqëruara me vonesat e ndryshme të dërgesës së vaksinave të tjera në Evropë dhe shqetësimeve rreth “AstraZenecas”. Si rrjedhojë, Spanja ka ndryshuar politikë, duke kaluar nga përdorimi i kësaj kure fillimisht mes më të rinjve në administrimin e saj vetëm tek personat e moshave 60-69 vjeçare.

Në një shenjë të ndryshimit të qëndrimeve, kryetarja e Komisionit Evropian, Ursula von der Leyen, ka njoftuar të mërkurën se blloku do t’i fillojë negociatat për blerjen e 1.8 miliardë dozave të vaksinës “Pfizer”-“BioNTech” deri në vitin 2023. Ndërkaq KE-ja ka marrë gjithashtu vendim që të mos i vazhdojë kontratat për sigurimin e vaksinave të “AstraZenecas” dhe “J&J”, pas skadimit të tyre.