26 të vrarë dhe 17 të plagosur nga sulmi ndaj turistëve në Kashmir

Njëzet e gjashtë persona janë vrarë dhe 17 janë plagosur kur militantët e dyshuar kanë sulmuar turistët në territorin e Indisë Jammu dhe Kashmir, ka bërë të ditur policia të mërkurën, sulmi më i keq i tillë në vend në gati dy dekada.

Sulmi ka ndodhur të martën në një livadh në zonën Pahalgam të territorit piktoresk, dhe të vdekurit përfshinin 25 indianë dhe një shtetas nepalez, sipas policisë.

Ky ishte sulmi më i keq ndaj civilëve në Indi që nga të shtënat në Mumbai të vitit 2008, dhe ka shkatërruar qetësinë relative në Kashmir, ku turizmi ka lulëzuar.

Kryeministri Narendra Modi ka ndërprerë vizitën e tij dy-ditore në Arabinë Saudite dhe është kthyer në Nju Delhi të mërkurën në mëngjes. 

Sulmi shihet si një pengesë ndaj asaj që Modi dhe partia e tij nacionaliste hindu Bharatiya Janata e kanë projektuar si një arritje të madhe në revokimin e statusit gjysmë autonom që gëzonin Xhamu dhe Kashmir, dhe për të sjellë paqe dhe zhvillim në rajonin e trazuar prej kohësh me shumicë myslimane.

Një grup militant pak i njohur, "Rezistenca e Kashmirit", ka marrë përgjegjësinë për sulmin në një mesazh në rrjetet sociale. Grupi ka shprehur pakënaqësinë që më shumë se 85,000 "të huaj" ishin vendosur në rajon, duke nxitur një "ndryshim demografik".