Përleshjet e dhunshme kanë vazhduar edhe më tutje në kryeqytetin e Ekuadorit, mes zemërimit të popullatës për masat shtrënguese.

Shpresat për ndaljen e trazirave më të këqija në Ekuador në të paktën një dekadë, u zbehën ndërsa përleshjet mes policisë dhe protestuesve kundër masave shtrënguese, vazhduan edhe në ditën e dhjetë në Quito, raporton KTV.

Me gjithë ofertat e Kombeve të Bashkuara për t’i ndërmjetësuar bisedimet pesë ditë më parë, presidenti Lenin Moreno dhe organizatorët e protestave ende nuk kanë gjetur gjuhë të përbashkët.

Presidenti Moreno ka refuzuar në mënyrë të përsëritur ta rikthejë një subvencion të vjetër të karburanteve, e që është kërkesa kryesore e protestuesve që thonë se heqja e tij ndëshkon në mënyrë disproporcionale të varfrit.