Nobelistja e Paqes do të ndërtojë spital për viktimat e dhunës seksuale Foto: Reuters

Nobelistja e Paqes do të ndërtojë spital për viktimat e dhunës seksuale

15 December 2018 17:43

Aktivistja irakiane, Nadia Murad, që ka fituar çmimin Nobel për Paqe këtë vit, për përpjekjet për t'i dhënë fund dhunës seksuale si armë e luftës, ka deklaruar se me paratë e fituara do të ndërtojë një spital në vendin ku jeton për viktimat e dhunës seksuale.

Murad, që ishte skllavëruar nga Shteti Islamik, i bëri këto komente para qytetarëve në vendlindjen e saj në Sinjar të Irakut.

“Me paratë që kam fituar do të ndërtoj një spital në Sinjar për të shëruar të sëmurët, kryesisht gratë e vetme dhe ato që janë ekspozuar ndaj dhunës seksuale nga militantët e Shtetit Islamik”, tha Murad, shkruan REL.

Ajo tha se do të fillojë të kontaktojë organizatat humanitare së shpejti për të filluar punën.

Murad ka pranuar çmimin prej 1 milion dollarësh së bashku me doktorin Denis Mukwege, për përpjekjet për t'i dhënë fund dhunës seksuale.

Murad ishte në mesin e 7,000 grave dhe vajzave që ishin kapur dhe ishin skllavëruar seksualisht nga luftëtarët e Shtetit Islamik më 2014. Ajo kishte arritur të ikte dhe ishte gjetur si refugjate në Gjermani, ku zhvilloi fushatë për të ndihmuar komunitetin Jazidi.

Më shumë se 3,000 pjesëtarë të komunitetit jazidi ishin vrarë në Irak më 2014.

Komentet

Shto koment

Të ngjashme