Prodhuesi gjerman i automjeteve, Volkswageni planifikon të investojë 180 miliardë euro gjatë pesë vjetëve në disa fusha, duke përfshirë prodhimin e baterive dhe burimin e lëndëve të para në një përpjekje për të ulur kostot e automjeteve elektrike dhe për të mbrojtur pjesën e saj të tregut, ka njoftuar kompania të martën, raportoi “Automotive”.
Mbi dy të tretat e buxhetit të investimeve 5-vjeçare të kompanisë, janë ndarë për elektrifikimin dhe digjitalizimin, duke përfshirë deri në 15 miliardë për bateritë dhe lëndët e para.
Me tregjet në trazira për shkak të rënies së Bankës Silicon Valley, shefi financiar Arno Antlitz, ka thënë se kompania mund të shtyjë disa investime në bateri nëse tregu nuk rritet siç pritej.
"Objektivi i përgjithshëm është të kesh në çdo kohë financa solide", ka thënë Antlitz.
Volkswagen, prodhuesi kryesor i veturave në Evropë, po përpiqet të mbyllë një hendek me pionierin e automjeteve elektrike Tesla, duke zgjeruar pjesën e tij të tregut në rritje për veturat me bateri.
Prodhuesi i makinave ende synon të sjellë vetura elektrike të përballueshme - që kushtojnë rreth 25,000 euro me çmimet e sotme - në treg deri në vitin 2025, të prodhuar në një version të gjeneratës së dytë të platformës së tij tërësisht elektrike.
