Gjiganti automobilistik, Mercedes-Benz ka njoftuar tërheqjen e menjëhershme të gati një milion veturave në gjithë botën për shkak të problemeve me sistemin e frenimit.
Autoriteti federal i transportit në Gjermani (KBA), ka thënë se veturat e prekura janë të prodhuara në periudhën 2004-2015 dhe bëhet fjalë për modelet ML, GL, dhe R-Class.
993 mijë e 407 vetura janë kërkuar të tërhiqen menjëherë nga tregu, përfshirë 70 mijë në Gjermani.
“Korrozioni në përforcuesin e frenave në rastin më të keq mund të çojë në ndërprerjen e lidhjes ndërmjet pedalit të frenave dhe sistemit të frenimit”, ka thënë KBA, raporton “The Guardian”. “Si pasojë, sistemi i frenimit mund të ndalë së funksionuari”.
Mercedes-Benzi ka konfirmuar thirrjen për tërheqje duke thënë se lëvizja po bazohet në “analizat e disa raportimeve të izoluara për modele të caktuara”.
“Në raste të rralla të korrozionit të madh, mund të jetë e mundshme që në një manovër të frenimit të madh të shkaktohen dëmtime mekanike në përforcuesin e frenave, ku si pasojë lidhja mes pedalit të frenave dhe sistemit të frenimit të dështojë. Në raste të tilla, tepër të rralla, nuk do të ishte e mundshme të frenohet dhe rreziku i përplasjes apo lëndimit do të rritej”, ka thënë kompania.
Edhe
Mercedesi pritet t’i tërheqë rreth 100 mijë makina në Gjermani
Mercedes-Benzi ka thënë se “do ta nisë menjëherë tërheqjen e veturave” dhe do t’i kontaktojë pronarët për “veturat potencialisht të prekura nga defekti”.
Deri në kohën e inspektimit të plotë, është kërkuar që këto vetura të mos jenë rrugëve.
