Ringjallja e emrave të modeleve klasike është trend në industrinë e automobilizmit kohëve të fundit. Përderisa Renaulti tashmë ka konfirmuar planet për modelet e ardhshme “5” dhe “4” për t’i paraprirë linjës elektrike, në afat më të shkurtër pritet të vijë tjetër model ikonik. Bëhet fjalë për Renault Espace, modelin që së pari u lansua më 1984.
Modeli tani do të jetë një SUV (veturë e lartë sportive). Espace bazohet në modelin Austral dhe do të jetë në dispozicion edhe me shtatë ulëse.
Gjenerata e gjashtë e modelit do të vijë në treg gjatë verës, ka bërë të ditur prodhuesi francez të martën, në prezantimin e modelit, të cilit s’ia ka bërë të ditur çmimin.
Renaulti ka thënë se Espace do të jetë më elegant dhe muskulor për shkak të ridizajnimit, por me hapësirë më të madhe.
Fuqia e këtij modeli do të vijë nga motori 1.2-litërsh hibrid, i kombinuar me dy motorë elektrikë. Ngasja në sistemin e tërheqjes me katër rrotat bazohet në “modelin hibrid dinamik”, që funksionon me motorë elektrikë që mbushen në vazhdimësi nga motori me djegie. Totali i fuqisë te ky model pritet të jetë rreth 200 kuajfuqi.
