Prodhuesi amerikan i automjeteve elektrike, Tesla, do të fillojë të paguajë 15.000 dollarë për veçoritë e ndihmës së shoferit, që i quan “Full Self Driving”, duke rritur çmimin e produktit të diskutueshëm për herë të dytë këtë vit, shkroi të hënën “Automotive News”.
Rritja për klientët në Amerikën e Veriut do të hyjë në fuqi më 5 shtator, ka njoftuar të dielën drejtori ekzekutiv i Teslas, Elon Musk.
Çmimi aktual prej 12.000 dollarësh do të respektohet për porositë e bëra para kësaj date, njoftoi ai.
Përdorimi i emrit “Full Self-Driving” nga ana e Teslas është kritikuar sepse veçoritë kërkojnë mbikëqyrje aktive dhe nuk i bëjnë automjetet e saj autonome.
Departamenti i Automjeteve të Californisë ka akuzuar kompaninë për mashtrim të konsumatorëve në lidhje me FSD-në dhe sistemin e saj më të kufizuar autopilot. Madje, janë hapur dy hetime të veçanta nëse autopiloti është me defekt.
Musk ka thënë në qershor se zgjidhja e çështjeve me teknologjinë e vetëdrejtimit të kompanisë do të jetë thelbësore për vlerësimin e kompanisë.
Aksionet e Teslas kanë rënë deri në 2.7 për qind në 866 dollarë përpara fillimit të tregtimit të rregullt të hënën.
© KOHA.
