Së paku tre zyrtarë të lartë të LDK-së, e kanë nisur ditën me Kohën Ditore, e i kanë vlerësuar lajme të mira ato që janë shkruar, me aludimin e qartë në kryelajmin e sotëm të gazetës, se LDK-ja dhe Vetëvendosje e kanë vënë në nivel të grupeve punuese mundësinë për koalicion parazgjedhor.
Deputeti i LDK-së për disa mandate, Arben Gashi, kryetari i Komunës së Vushtrrisë, Xhafer Tahiri dhe Faton Peci, kanë postuar fotografi me Kohën Ditore të ditës së sotme.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Lajme të mira”, ka shkruar deputeti Gashi, duke e shoqëruar këtë shkrim të shkurtë me një figurë të shkeljes së syrit.
“Ndryshimin e bëjmë bashkë , me dije dhe me zemër, pa bajraktarizëm por me vullnetin e qytetarit”, ka shkruar në postimin e vet Tahiri, që po ashtu e ka shoqëruar me fotografinë ku shihet duke e lexuar gazetën.
“Lajme hard copy”, ka shkruar Peci.
Koha Ditore në lajmin kryesor të numrit të sotëm ka shkruar për takimin e parë në nivel të grupeve punuese në mes të Lidhjes Demokratike të Kosovës dhe Lëvizjes Vetëvendosje, në kuadër të përpjekjeve për arritjen e koalicionit parazgjedhor, i cili megjithatë ka përfunduar pa pajtueshmëri rreth kandidatit për kryeministër e as për parimet qeverisëse.
Nga takimet ndërmjet kryetarëve, Isa Mustafa dhe Albin Kurti, këto dy subjekte i kanë zgjeruar konsultat edhe në grupe punuese. Të hënën është mbajtur edhe takimi i parë mes tyre. Nga ana e LVV-së kanë qenë Glauk Konjufca dhe Besnik Bislimi, ndërsa nga LDK-ja, Avdullah Hoti dhe Kujtim Shala.
Derisa në LDK nuk janë deklaruar pjesëmarrësit e takimit dhe modalitetet që janë diskutuar, në LVV thonë se aty i kanë shpalosur arsyet pse Albin Kurti duhet të jetë kandidat i përbashkët për kryeministër.
Ndërkaq LDK-së i është ofruar posti i presidentit dhe ai i kryetarit të Kuvendit. (Më shumë detaje mund të gjeni në numrin e sotëm të Kohës Ditore)