Jeton Zulfaj nga Lëvizja Vetëvendosje, ka thënë se Prokuroria nuk e ka gatishmërinë për të ngritur hetime për rastet e korrupsionit.
Ai thotë se, përmes raporteve të ndryshme është parë se, për të ngritur hetime Prokuroria ka pritur që dikush të bëjë kallëzim penal.
Një praktikë e tillë sipas Zulfajt është e gabuar, sepse është më e vështirë të luftohet korrupsioni.
Ai në emisionin “Express Intervista” të KTV-së tha se në raportet e fundit të prokurimit vërehet rritja e shpenzimeve në kategoritë e luksit tek institucionet e vendit. Ndërkaq shtoi se janë nënshkruar dy mijë kontrata më shumë se sa në vitin 2017.
“Janë rrit edhe kontratat edhe niveli i shpenzimeve. ¼ e buxhetit ka shkuar përmes prokurimit. Ministria e Infrastrukturës e ka rrit nivelin e prokurimit më shumë se sa që duhet. Me të drejtë e quajnë Ministria e Asfaltit sepse nuk ka pas investime tjera përveç asfaltit”,ka thënë ai.
Edhe
Paralajmërohet “përgjigje e shpejtë dhe e duhur” e Qeverisë për rastin e hulumtuar nga KOHA
Ai thotë se, që pas shpalljes së pavarësisë politikanët janë bërë milioner përmes asfaltit.
“Prej që është shpallur pavarësia e kemi parë që përmes asfaltit mundesh u bë milioner. Kanë bërë kompani në emër të dajave e të afërme e pastaj kanë marrë vetë tenderë. Ka pasur kompani që nuk e ka pasur as edhe një mjet, por ka fitu tender”, ka deklaruar ai.
Sipas tij, buxheti duhet të përqendrohet në sektorët e prodhimit duke shtuar se Qeveria aktuale ka shpërndarë para tek ata klientë që i vjedhin bujqit.
“Çka ka kuptim taksa ndaj Serbisë nëse ti vjedh prej bujqve”, ka shtuar ai.
Ai thotë se institucionet duhet të hapin kontratat dhe pronarët e tenderëve në mënyrë që të shmangen rastet e korrupsionit.
“Ka shumë kompani që marrin tenderë mirëpo nuk dihet se kush është pronarë. Bechtel-enka ka marrë 1 miliard euro në Kosovë mirëpo ende nuk dihet se kush është pronar i Bechtel-it. Ministria e Infrastrukturës ka nënshkruar kontratë 42 milionë euro për zgjatjen e pistës së Aeroportit pa bërë konkurs publik, ky është nepotizëm. Raste të tilla kemi plotë”, ka thënë ai.
Edhe
Lekaj del para gjykatës, nis rasti “53 milionët”
Ndërkaq lidhur me kalimin e tij nga Shoqëria Civile në Lëvizjen Vetëvendosje ka thënë se përmes kyçjes në politikë do të mund të kontribuojë më shumë në adresimin e rasteve të korrupsionit.
“Puna që kam bërë unë ka qenë me e ngrit zërin për me senzibilizu opinionin. Unë mendoj që përmes subjektit politik ndryshimet munden me qenë më reale”, ka përfunduar ai.
