Zhiviq i ofron mbështetje Agjencisë Pyjore të Kosovë

Stafin e Agjencisë Pyjore të Kosovës sot e vizitoi ministrja e MBPZHR-së, Dijana Zhiviq, bëhet e ditur përmes një komunikate për media.

Zhiviq me stafin e saj u pritën nga kryeshefi i APK-së, Ahmet Zejnullahu i cili e prezantoi ministren me stafin e kësaj Agjencie, e cili funksionon në kuadër të MBPZHR-së.

“Gjatë kësaj vizite, ministrja është njohur për së afërmi me detyrat dhe punën e Agjencisë, si dhe ka biseduar me stafin e saj, të cilët u shprehën entuziast me vizitën e ministres”, thuhet në komunikatë, transmeton Koha.net.

Nga ana e saj, Zhiviq potencoi se do të japë mbështetjen e saj dhe të stafit të saj për të realizuar qëllimet e tyre, si dhe u premtoi se gjatë mandatit të saj do të ofrojë mbështetjen e saj të pakusht për avancimin dhe zhvillimin e mëtutjeshëm të këtij institucioni.

Zejnullahu falënderoi ministren për vizitën dhe përkrahjen. Ai u shpreh i bindur se përmes angazhimit të ministres dhe të bashkëpunëtorëve, do të japin një impuls të ri në zhvillimin e sektorit të pylltarisë, duke ndikuar kështu në arritjen e rezultateve më të mira për këtë sektor, si një nga më të rëndësishmit për zhvillimin ekonomik të vendit.