Ministri i Shëndetësisë, Armend Zemaj, ka qëndruar sot për vizitë në spitalin rajonal të Gjakovës, nga ku ka bërë thirrje që të mos manipulohet me numrin e vdekjeve nga COVID-19.
Ai ka bërë thirrje për respektim të masave, duke shtuar se vetëm kujdesi mund të mënjanojë që sistemi i shëndetësisë të mos rëndohet.
“Që ky sistem të mos rëndohet, bëj thirrje që të ketë kujdes të shtuar dhe gjithashtu apeloj që kjo situatë të mos përdoret politikisht dhe të mos manipulohet me numrin e vdekjeve. Beteja jonë politike nuk duhet të bëhet në situatë të tillë fragjile. Në anën tjetër, edhe njëherë falënderoj të gjithë qytetarët që edhe sot po tregojnë mirëkuptim dhe përmbajtje”, ka thënë ministri Zemaj.
Ndryshe, dje në komunën e Gjakovës janë shënuar 3 viktima, në mesin e tyre edhe mjeku, Kujtim Zarari, familjeve të të cilëve ministri Zemaj iu shprehu ngushëllime. Ndërkaq deputeti i Lëvizjes Vetëvendosje, Agon Batusha përmes një postimi në Facebook, ka thënë se për dy orë, në spitalin e Gjakovës kanë vdekur 5 pacientë.
