Vuçiqi pret që në ditët në vijim të ftohet në Bruksel

Presidenti i Serbisë, Aleksandar Vuçiq, ka thënë se pret që të ftohet nga Bashkimi Evropian ditët në vijim, pas situatës së shkaktuar në Kosovë nga vendimi i Bankës Qendrore që euroja të jetë e vetmja valutë.

Pas takimit që ka pasur me përfaqësuesin e lartë të BE-së për politikë të jashtme, Josep Borrell, dhe emisarin e BE-së për dialogun Kosovë-Serbi, Miroslav Lajçak, Vuçiqi ka thënë se nuk pret që BE-ja të marrë masa “ndaj Prishtinës, që po përpiqet të bëjë spastrim etnik të serbëve të Kosovës”.

Ai ka shtuar se “Borrelli është korrekt dhe e kupton çfarë po ndodh”, por sipas tij, “ka vullnet të dobët”.

Nga shtatori nuk ka pasur takim të liderëve të Kosovës dhe Serbisë.

BE-ja në verë të vitit të kaluar i vuri masa të karakterit politik e ekonomik Kosovës, pasi Qeveria refuzoi që t’i heqë menjëherë kryetarët e komunave të veriut nga zyrat dhe policinë nga dhe përreth ndërtesave komunale.

Sanksionet e BE-së ndaj Kosovës përfshijnë suspendimin e përkohshëm të punës së komisioneve të përbashkëta në mes të BE-së dhe Kosovës, të krijuara në bazë të Marrëveshjes së Stabilizim-Asociimit, mosdërgimi i ftesave zyrtarëve të Kosovës për takime të nivelit të lartë, suspendimi i vizitave bilaterale, me përjashtim të atyre që kanë për qëllim fokusimin në adresimin e krizës në veri të Kosovës në kuadër të kornizës së dialogut të lehtësuar nga BE-ja. Pjesë e sanksioneve janë edhe pezullimi i programit të IPA 2024 për Kosovën dhe mosshqyrtimi i projekteve në kuadër të Kornizës së Investimeve për Ballkanin Perëndimor.