Presidenti i Serbisë, Aleksandar Vuçiq, ka thënë se “Serbia është gjithmonë e gatshme për dialog” dhe “për të respektuar gjithçka që është nënshkruar dhe është rënë dakord”, në një takim që ka pasur me emisarin e Bashkimit Evropian për dialogun Kosovë-Serbi, Miroslav Lajçak.
Deklarata e Vuçiqit bie ndesh me qëndrimet e tij të para pak ditëve e javëve se Serbia nuk e pranon Kosovën dhe nuk lejon pranimin e saj në Organizatën e Kombeve të Bashkuara, edhe pse njohja de-facto iu kërkua nga liderët evropianë e se në Marrëveshjen bazë Serbia pajtohet të mos pengojë rrugën e Kosovës në pranimin ndërkombëtar.
Sipas njoftimit nga Presidenca e Serbisë, Vuçiqi ka thënë se “Serbia është e vendosur për shtensionim, paqe dhe stabilitet”. Vuçiq po ashtu ka “informuar në detaje përfaqësuesin special të BE-së për situatën me të cilën ballafaqohen serbët, si në veri ashtu edhe në jug të Ibrit”.
Në këtë takim, sipas njoftimit, Vuçiqi ka insistuar në formimin e Asociacionit të komunave me shumicë serbe.
Diplomati evropian në Beograd ka qëndruar të martën, dy ditë para takimit të paralajmëruar të kryenegociatorëve në Bruksel.
Edhe
Lajçaku e Vuçiqi flasin për zbatimin e Marrëveshjes bazë
Në fund të tetorit, pesë përfaqësues të Shteteve të Bashkuara të Amerikës, Bashkimit Evropian, Gjermanisë, Francës dhe Italisë, dorëzuan në Kosovë dhe Serbi një draft për Asociacionin e komunave me shumicë serbe. Në takimet pasuese me liderët evropianë, kryeministri Albin Kurti kërkoi nënshkrimin e draftit si pjesë të pakos me Marrëveshjen Bazë dhe Aneksin e zbatimit. Serbia refuzoi nënshkrimin.
Pas takimeve, liderët evropianë kërkuan që Kosova të nisë me themelimin e Asociacionit e nga Serbia jetësimin e njohjes de-facto.
